आम्हाला न्याय द्या! RB च्या फॅमिलीने जोडले हात; Bigg Boss Marathi 6 च्या घरात राकेशशी राडा विशालला भोवणार

राकेशचं कुटुंब म्हणालं, बिग बॉसच्या नियमांनुसार आणि कायदेशीर करारानुसार स्पर्धकांना घराबाहेरील वैयक्तिक बाबींवर चर्चा करणं किंवा त्यावरून कोणाला लक्ष्य करण्ययास सक्त मनाई आहे. अशा प्रकारचं उल्लंघन झाल्यास गंभीर कारवाई होऊ शकते, ज्यामध्ये शोमधून बाहेर काढण्याचाही समावेश आहे.

तरी विशाल कोटियनने हा नियम वारंवार मोडला आहे. शोच्या सुरुवातीपासूनच हे सुरू असून यावेळी त्याने मर्यादा ओलांडल्या आहेत. हा शोच्या आचारसहितेचा गंभीर आणि अस्वीकार्य भंग आहे. याहूनही अधिक चिंताजनक बाब म्हणजे हा प्रकार केवळ शब्दिक चिथावणीपुरता मर्यादित नव्हता. हेतुपुरस्सर शारीरिक चिथावणी देण्याली, वैयक्तिक मर्यादा ओलांडण्यात आल्या आणि परिस्थिती कॅमेऱ्यासमोर शारीरिक आक्रमकतेपर्यंत पोहोचली, जे नियमांचं आणखी एक मोठं उल्लंघन आहे, असं बापट कुटुंब म्हणालं.

शोमध्ये शारीरिक आक्रमकतेविरुद्ध किरकोळ कारवाई करण्यात आली असल्याचं आम्ही पाहिलं आहे. मात्र इतर स्पर्धकांच्या वैयक्तिक बाबी उकरून काढण्याचा जो गंभीर कायदेशीर भंग झाला आहे, तो अद्याप दुर्लक्षित राहिला आहे. एक कुटुंब म्हणून आम्ही अत्यंत व्यथित आणि निराश आहोत. त्यांच्या चाहत्यांमध्येही मोठ्या प्रमाणावर नाराजी असल्याचं बापट कुटुंबाने सांगितलं.

महाराष्ट्रातील लाखो कुटुंबांनी पाहिल्या जाणाऱ्या या लोकप्रिय शोची प्रतिष्ठा जपण्यासाठी योग्य उदाहरण घालून द्यावे, अशी आमची विनंती आहे. तसंच रितेश देशमुख यांनी या सर्व उल्लंघनांची गांभीर्याने दखल घ्यावी, अशी अपेक्षा बापट कुटुंबाने व्यक्त केली आहे आहे.

राकेशने या शोमध्ये सहभागी होण्याचा निर्णय पूर्ण विश्वासाने घेतला होता. रितेश देशमुख यांचा या शो मधील सहभागामुळे हा मंच सुसंस्कृत, आदरयुक्त आणि कुटुंबासोबत पाहण्यास योग्य राहील, असा त्यांचा विश्वास होता. संपूर्ण प्रवासात राकेश यांनी नेहमी संयम, सन्मान आणि प्रतिष्ठा राखली आहे. घराबाहेरील कोणत्याही वैयक्तिक बाबींवरून त्यांनी कधीही कोणाचीही अवहेलना केलेली नाही. आमचे कुटुंब, मित्र आणि चाहते ठामपणे त्यांच्या पाठीशी उभे आहेत, असं कुटुंबाने सांगितलं आहे.

दरम्यान आता राकेशसोबतचं वागणं आणि त्यानंतर बापट कुटुंबाची ही मागणी यावर बिग बॉस, रितेश देशमुख काय निर्णय घेणार याकडे सगळ्यांचं लक्ष लागलं आहे.