कपूर घराण्याचा वारस, ज्याच्या मृत्यूसाठी आईनेच रचला सापळा, मग कसा बनला सुपरस्टार?

बॉलिवूडचा चार्मिंग हिरो, शशि कपूर यांचा जन्मदिवस १८ मार्च रोजी येतो. कपूर खानदानातील हे नाव खूप मोठं आहे आणि त्यातही शशि कपूर यांचं स्थान अनोखं होतं. पृथ्वीराज कपूर यांचे ते सर्वात धाकटे पुत्र आणि राज कपूर यांचे भाऊ. पण त्यांच्या जन्मामागची गोष्ट अतिशय रंजक आहे.

१९३७ च्या सुमारास पृथ्वीराज कपूर चित्रसृष्टीत स्वतःला सिद्ध करण्यासाठी धडपडत होते. त्याच दरम्यान त्यांच्या पत्नी रामसरणी गर्भवती राहिल्या. आधीच राज आणि शम्मी अशी दोन मुलं असताना आणखी एका बाळाची जबाबदारी त्यांना नको होती.

त्याकाळी अबॉर्शनची सोय फारशी नव्हती तरी रामसरणी यांनी अनेक प्रयत्न केले. सायकलवरून पडणे, जिन्यावरून पाय घसरवणे, अगदी दोरी-उड्या करणे असे अनेक धोकेदार प्रयत्न त्यांनी केले. पण नियतीला काही वेगळंच मंजूर होतं. १८ मार्च १९३८ रोजी शशि कपूर यांचा जन्म झाला. स्वयं शशि कपूर यांनी १९९५ मध्ये दिलेल्या एका मुलाखतीत ही धक्कादायक गोष्ट उघड केली होती.

शशि कपूर यांच्या प्रेमकहाणीतही एक वेगळाच ट्विस्ट आहे. त्यांनी जेनिफर केंडल या ब्रिटीश अभिनेत्रीशी लग्न केले. जेनिफर वयाने शशिजींपेक्षा पाच वर्षांनी मोठ्या होत्या. पण प्रेमापुढे वयाचे हे बंधनही तुटले. विशेष म्हणजे सुरुवातीला काही गैरसमजुतींमुळे जेनिफर यांना शशि कपूर समलिंगी असल्याचा संशय आला होता!

शशि कपूर यांना लहानपणापासूनच रंगभूमीची ओढ होती. पृथ्वी थिएटरमध्ये ते फक्त ५० रुपये मासिक वेतन घेऊन काम करायचे. त्याच सुमारास त्यांना 'शेक्सपिएराना' या नाट्य कंपनीत काम करण्याची संधी मिळाली. या कंपनीचे प्रमुख जेनिफर यांचे वडील होते. शशि कपूर खूपच लाजरे होते, त्यामुळे सुरुवातीला त्यांनी जेनिफरशी फारसं बोलणंही केलं नाही. याचमुळे जेनिफर यांना शशि समलिंगी असल्याचा गैरसमज झाला होता.

१९५७ मध्ये शशि कपूर आणि जेनिफर सिंगापूरमध्ये नाटक सादर करण्यासाठी गेले होते. याच काळात दोघांमध्ये प्रेम फुलले आणि १९५८ मध्ये त्यांचा विवाह झाला. यावेळी शशि कपूर फक्त २० वर्षांचे होते तर जेनिफर २५ वर्षांच्या होत्या. त्यांना करण, कुणाल आणि संजना ही तीन अपत्ये झाली.

१९८४ मध्ये कर्करोगाने जेनिफर यांचे निधन झाले. जेनिफर यांच्या जाण्याने शशि कपूर यांना खूप मोठा धक्का बसला आणि त्यातून ते कधीच सावरू शकले नाहीत. ४ डिसेंबर २०१७ रोजी शशि कपूर यांनीही या जगाचा निरोप घेतला.