Madhavi Nimkar : 'माझं आणि नवऱ्याचं जे काही असेल ते...' डिवोर्सच्या चर्चांवर माधवी निमकरनं सोडलं मौन

सुख म्हणजे नक्की काय असतं या मालिकेत शालिनी बनून प्रेक्षकांच्या मनावर राज्य करणारी प्रसिद्ध अभिनेत्री माधवी निमकर. मालिका जरी संपली असली तरी माधवी सोशल मीडियाच्या माध्यमातून प्रेक्षकांच्या भेटीला येत असते.

दरम्यान माधवीच्या सोशल मीडियावरून अनेकदा तिचा डिवोर्स झाला आहे का असे प्रश्न तिला विचारण्यात येतात. माधवी कधीच तिच्या पर्सनल लाइफमधील घडामोडी सोशल मीडियावर शेअर करत नाही. फक्त तिच्या कामाचे अपडेट्स आणि फोटोशूट शेअर करत असते. दरम्यान एका मुलाखतीत माधवीनं डिवोर्सच्या चर्चांवार अखेर मौन सोडलं आहे.

लोकमत फिल्मीला दिलेल्या मुलाखतीत माधवी म्हणाली, "हे खूप जजमेंटल होतात. सोशल मीडिया म्हटलं की, कलाकार अनेकदा त्यांच्या कुटुंबीयांसोबत फोटो काढतात. ही निवड प्रत्येकाची आहे. चूक-बरोबर हा मुद्दा नंतरचा आहे."

"मी अशीही कुटुंब जवळून पाहिली आहेत की ज्या जोडप्यांची एकमेकांबद्दल चांगली मतं नाहीत किंवा जे एकमेकांचा आदर करत नाहीत किंवा त्यांची भांडणंही मला जवळून माहीत आहेत ते लोक सोशल मीडियावर प्रेमात आकंठ बुडाल्यासारखे वागतात. कदाचित त्यांना त्यांची ती बाजू झाकायची असेल. समाजासाठी ते एकत्र असल्याचे त्यांना दाखवायचे असेल, ही त्यांची इच्छा असेल."

माधवी पुढे म्हणाली, "मला कुठेतरी हे आवडत नाही. 2010 पासून जेव्हापासून इन्स्टाग्राम आलंय तेव्हापासून माझं कुटुंब इन्स्टाग्रामवर कधीच आलेलं नाही. तेव्हाही घटस्फोट वगैरे झालेला नव्हता आणि आताही झालेला नाही."

"माझे मिस्टर मला स्वत: सांगायचे की, इन्स्टाग्रामचा ट्रेन्ड येतोय तर तू फोटो वगैरे टाकत जा. तेव्हा माझा मुद्दा असा होता की याकडे केवळ प्रोफेशनच्या दृष्टीकोनातून एक चांगल माध्यम म्हणून याचा वापर करायचा आहे."

कुटुंबासोबतचे फोटो का टाकत नाही असा प्रश्न विचारल्यानंतर उत्तर देत माधवी म्हणाली, "माझं नवीन लग्न झालेलं नाही की प्रत्येक पहिल्या दसरा-दिवाळीला फोटो टाकायला हवा. मी पहिल्यापासून ते कधी टाकत नाही. क्वचित कधीतरी आमच्या दोघांच्या मनात आलं तर आम्ही तो फोटो टाकला आहे."

"माझा नवरा आणि माझे जे काही वाद असतील ते ना आम्हाला सोशल मीडियावर टाकायला आवडतात, ना त्याचा बाऊ करायला आवडतो. माझ्या मुलालाही सोशल मीडियामध्ये विशेष रस नाही. सोशल मीडिया माझ्या प्रोफेशनपुरतं मर्यादित राहिलं पाहिजे असं मला वाटतं", असंही माधवी म्हणाली.