Weather Alert: मराठवाड्यावर पुन्हा संकट, विजा अन् वाऱ्यासह जोरदार पाऊस, 3 जिल्ह्यांना अलर्ट

महाराष्ट्रातून मान्सूनने माघार घेतली असली तरी देखील दिवाळीत काही भागात पावसाचा जोर कायम आहे. मराठवाड्यात देखील हवामानात मोठे बदल जाणवत असून तापमानात वाढ झालेली असतानाच पावसाचा इशारा कायम आहे. आज छत्रपती संभाजीनगरसह मराठवाड्यातील 8 जिल्ह्यांचा हवामान अंदाज जाणून घेऊ.

मराठवाड्यातील छत्रपती संभाजीनगर आणि जालना जिल्हा वगळता सर्व जिल्ह्यांत आज पासवाची शक्यता आहे. हवामान विभागाने परभणी, हिंगोली आणि नांदेड या तीन जिल्ह्यांना पुढील 24 तासांसाठी यलो अलर्ट जारी केला आहे. या काळात ताशी 30 ते 40 किमी वेगाने वारे वाहतील. तसेच विजांसह जोरदार पावसाचा अंदाज आहे.

छत्रपती संभाजीनगर आणि जालना जिल्ह्यात उन्हाचा चटका वाढला आहे. आज पावसाचा कोणताही अलर्ट नाही. हवामान कोरडे राहणार असून ऑक्टोबर हिट जाणवेल. बुधवारी तुरळक पावसाचा अंदाज असून त्यानंतर कोरडे हवामान कायम राहील.

बीड, लातूर आणि धाराशिव या जिल्ह्यांत आज विजांसह तुरळक पावसाची शक्यता आहे. मात्र, या जिल्ह्यांना कोणताही मुसळधार पावसाचा इशारा नाही.

दरम्यान, मराठवाड्यातील हवामानात सातत्याने बदल जाणवत आहेत. पुढील काही दिवस संमिश्र स्वरुपाचे हवामान राहील. कधी उन्ह तर कधी पाऊस अशी स्थिती राहणार असल्याने नागरिकांनी आरोग्याची काळजी घेणे गरजेचे आहे.