Weather Alert: मराठवाड्यात 24 तास पावसाचे, बीड, लातूरसह 6 जिल्ह्यांना अलर्ट, आजचा हवामान अंदाज

गेल्या काही दिवसांपासून मराठवाड्यातील हवामानात मोठे बदल जाणवत आहेत. पावसाने विश्रांती घेतल्यामुळे शेतकऱ्यांची चिंता वाढली आहे. अशातच आज दिलासादायक बातमी आहे. आज बीड, लातूरसह मराठवाड्यातील 6 जिल्ह्यांत विजांसह जोरदार पावसाची शक्यता आहे. पुढील 24 तासांचा हवामान अंदाज जाणून घेऊ.

मराठवाड्यातील छत्रपती संभाजीनगरसह जालना जिल्ह्यात आज हलक्या पावसाचा अंदाज आहे. काही ठिकाणी विजांच्या कडकडाटात पाऊस होईल. परंतु, या दोन्ही जिल्ह्यांना हवामान विभागाने कोणताही सतर्कतेचा अलर्ट दिलेला नाही. पुढील काही दिवस हवामानाची हीच स्थिती कायम राहणार आहे.

बीड, परभणी आणि धाराशिव या जिल्ह्यांत आज जोरदार पावसाची शक्यता असून हवामान विभागाने यलो अलर्ट जारी केला आहे. याठिकाणी ताशी 30 ते 40 किमी वेगाने वारे वाहतील. तसेच विजांचा कडकडाट आणि ढगांच्या गडगडाटात जोरदार पावसाचा अंदाज हवामान विभागाने वर्तवला आहे. पुढील 24 तासानंतर हवामानात पुन्हा बदल होण्याची शक्यता आहे.

लातूर आणि नांदेडमध्ये आज ताशी 40 ते 50 किमी वेगाने वारे वाहतील. तसेच विजांचा कडकडाट आणि सोसाट्याच्या वाऱ्यात मुसळधार पावासाची शक्यता आहे. या दोन्ही जिल्ह्यांना हवामान विभागाने यलो अलर्ट दिला असून नागरिकांना योग्य ती काळजी घ्यावी लागेल.

दरम्यान, पुढील 24 तास मराठवाड्यातील सर्वच जिल्ह्यांत पावसाची शक्यता वर्तवण्यात आलीये. त्यानंतर पुन्हा हवापालट होण्याची शक्यता असून पावसाचा जोर ओसरणार आहे. त्यामुळे चांगल्या पावसासाठी शेतकऱ्यांना काही दिवसांची वाट पाहावी लागेल.