Marathwada Rain: पाऊस परतला! मराठवाड्यात 72 तासांसाठी अलर्ट, 5 जुलैचा हवामान अंदाज

राज्यातील काही भागात मान्सूनचा जोर वाढत चालला आहे, मराठवाड्यात पावसाने काही दिवस उघडीप घेतली होती. आता मात्र मान्सून सक्रिय होण्याचे संकेत आहेत. आज 5 जुलै रोजी छत्रपती संभाजीनगरसह 4 जिल्ह्यांना सतर्कतेचा येलो अलर्ट हवामान विभागाने जारी केला आहे. हवामानात महत्वाचे बदल जाणवत असून पुढील काही दिवस जोरदार पावसाचा अंदाज आहे.

छत्रपती संभाजीनगरसह जालना, परभणी, आणि हिंगोलीत आज जोरदार पावसाचा अंदाज आहे. त्यामुळे या 4 जिल्ह्यांना हवामान विभागाने सतर्कतेचा येल अलर्ट जारी केला आहे. पुढील काही काळ हीच स्थिती कायम राहण्याची शक्यता आहे. या काळात 30 ते 40 किमी प्रतितास वेगाने वारे वाहतील तसेच सोसाट्याचा वारा आणि विजांच्या कडकडाटात हलका ते मध्यम स्वरूपाचा पाऊस होईल, असा इशारा हवामान विभागाने दिला आहे.

मराठवाड्यातील उर्वरित बीड, नांदेड, लातूर आणि धाराशिव या 4 जिल्ह्यात हलका ते मध्यम स्वरूपाचा पाऊस शक्यता आहे. तसेच एक दोन ठिकाणी हलका पाऊस होईल. उद्या 6 जुलै पासून लातूर आणि धाराशिव वगळता 6 जिल्ह्यांना जोरदार पावसाचा इशारा देण्यात आला आहे. या काळात विजांचा कडकडाटासह आणि ढगांचा गडगडाटात हलका ते मध्यम पाऊस होईल.

मराठवाड्यात पुढील 3 दिवस पावसाचे असणार आहेत. हवामान विभागाने सोसाट्याचा वारा आणि विजांच्या कडकडाटासह पावसाचा इशारा दिला आहे. या काळात छत्रपती संभाजीनगरह 6 जिल्ह्यांत 72 तासांसाठी पावसाचा यलो अलर्ट दिला आहे. लातूर आणि धाराशिवमध्ये मात्र एक दोन ठिकाणी हलका पाऊस होण्याची शक्यता आहे.

दरम्यान, मराठवाड्यात मान्सून पुन्हा सक्रीय होणार आहे, अनेक दिवसांच्या प्रतीक्षेनंतर खरीप पेरण्यांना आवश्यक असलेला पाऊस मिळण्याची शक्यता आहे. हवामान विभागाने दिलेल्या इशाऱ्यांनुसार नागरिकांनी आणि शेतकऱ्यांनी खबरदारी घेऊन आवश्यक उपाययोजना करणे महत्त्वाचे असणार आहे.