5 तासांत 8000 रुपयांची दरवाढ, जळगावच्या सराफ मार्केटमध्ये होळीआधीच खळबळ

जळगाव प्रतिनिधी, नितीन नांदूरकर: देशाची सुवर्णनगरी म्हणून ओळखल्या जाणाऱ्या जळगावमध्ये आज सोन्या-चांदीच्या दरांनी नवा इतिहास रचला आहे. गेल्या काही दिवसांपासूनच्या चढ-उतारानंतर आज बाजारात मोठी खळबळ उडाली. सोन्याच्या दरात १ हजार रुपयांची वाढ झाली असताना, चांदीने मात्र तब्बल ८ हजार रुपयांची दरवाढ अवघ्या 5 तासांमध्ये झाली आहे.

विकेण्डआधी झालेली ही दरवाढ ग्राहकांसाठी मोठा धक्का आहे. होळी-गुढीपाडव्याला सोन्या चांदीची खरेदी केली जाते. मात्र ही दरवाढ चांगलीच महागात पडणार असून ग्राहक पाठ फिरवतील अशी शक्यता आहे.

जळगावच्या सराफ बाजारात आज सोन्या-चांदीच्या दरांनी उच्चांक गाठला. जीएसटीसह सोन्याचा दर आता १ लाख ६३ हजार ७७० रुपयांवर पोहोचला. चांदीसाठी आता प्रति किलोमागे २ लाख ७८ हजार १०० रुपये मोजावे लागणार आहेत.

सराफ व्यावसायिकांच्या मते, आंतरराष्ट्रीय बाजारात झालेली तेजी आणि डॉलरच्या तुलनेत रुपयाची घसरलेली किंमत यामुळे ही दरवाढ झाली आहे. तसेच, सुरक्षित गुंतवणूक म्हणून गुंतवणूकदारांचा कल पुन्हा एकदा सोन्या-चांदीकडे वाढल्याने बाजारात ही मोठी तेजी पाहायला मिळत आहे.

लग्नाचा सीझन तोंडावर असताना झालेल्या या दरवाढीमुळे ग्राहकांनी सध्या 'वेट अँड वॉच'ची भूमिका घेतली आहे. अनेकांनी आपली खरेदी काही काळासाठी पुढे ढकलली आहे. दुसरीकडे, सोन्या-चांदीचे भाव अजून वाढतील या अपेक्षेने मोठ्या गुंतवणूकदारांची मात्र सराफ कट्ट्यावर गर्दी वाढल्याचे चित्र आहे.