Vidarbha Weather Update: विदर्भात थंडीचा जोर कमी, पुढील 24 तासांत पावसाचा अलर्ट, पाहा हवामान अंदाज

राज्यात डिसेंबर महिन्याच्या सुरुवातीलाच हवामानात मोठे बदल जाणवत आहेत. थंडी, पाऊस आणि ऊन अशा विचित्र हवामानाचा सामना नागरिकांना करावा लागणार आहे. विदर्भात गेल्या काही दिवसांपासून ढगाळ हवामानासह धुक्याचे सावट आहे.

दिवाळीपासून विदर्भात थंडीची तीव्रता कायम होती. आता यात घट होत असून पुढील काही दिवसांत गारठा कमी होणार आहे. तर विदर्भातील काही जिल्ह्यांत पावसाची शक्यता वर्तवण्यात आलीये. विदर्भातील काही जिल्ह्यांत दुपारी किंवा सायंकाळी पावसाच्या हलक्या सरी कोसळण्याचा अंदाज आहे.

विदर्भातील प्रमुख शहर असलेल्या नागपूरमध्ये आज 1 डिसेंबरला किमान तापमान 16 अंश सेल्सिअस तर कमाल तापमान 30 अंश सेल्सिअस इतके असणार आहे. काही दिवसांपूर्वी नागपूरमधील पारा 11 अंश सेल्सिअसवर घसरला होता. आता त्यात वाढ झालेली दिसून येत आहे.

नागपूरसह वर्धा, चंद्रपूर, वाशिम या जिल्ह्यातील किमान तापमान 16 अंश सेल्सिअस तर अमरावती, गोंदिया, बुलढाणा, यवतमाळ या जिल्ह्यातील किमान तापमान 15 अंश सेल्सिअस इतके असणार आहे. सर्वच जिल्ह्यातील किमान तापमानात वाढ झाल्याने विदर्भातील थंडीचा जोर काहीसा कमी झालेला दिसून येत आहे.

चंद्रपूर, गडचिरोली, भंडारा, यवतमाळ या जिल्ह्यांत तुरळक ठिकाणी 1 ते 5 डिसेंबर पर्यंत दुपारनंतर विजांच्या कडकडाट आणि हलक्या पावसाची शक्यता हवामान विभागानं वर्तवली आहे. विदर्भात थंडी आणि ढगाळ वातावरण तर होतेच पण पुढील 24 तासांत पावसाचे आगमन होण्याची शक्यता देखील आहे. त्यामुळे नागरिकांनी आरोग्याची तर शेतकऱ्यांनी पिकांची काळजी घेण्याची गरज आहे.