लतादीदींचा जगावेगळा भक्त, थेट घरातच उभारलं मंदिर

गानसम्राज्ञी लता मंगेशकर यांचा आवाज सर्वांना मंत्रमुग्ध करणारा आहे. लतादीदींचे देशभरात कोट्यावधी चाहते आहेत. असाच एक चाहता वर्धा जिल्ह्यातील आर्वी या ठिकाणी आहे. राजीव देशमुख असं त्यांचं नाव असून त्यांना बालपणापासूनच लतादीदींच्या गाण्यांचं वेड आहे.

राजीव देशमुख यांना वयाच्या तेराव्या वर्षापासून लतादीदींच्या गाण्यांचा छंद लागला. लतादीदींच्या गाण्यांचं देशमुख यांना इतकं वेड आहे की त्यांच्या घराच्या भिंतीवर दीदींचे अनेक फोटो लावले आहेत. त्यांच्यासोबतच्या भेटीचा प्रसंग दर्शवणारा एक फोटो लावला आहे.

एवढंच नाही तर स्वतःच्या लग्नाच्या पत्रिकेत देखील गानसम्राज्ञी लता मंगेशकर यांचा फोटो लावायलाही ते विसरले नाहीत. त्यांनी लतादीदींवर तयार केलेल्या गीताला स्वत:च्या आवाजात रेकॉर्ड केलंय. तसेच रोज पूजा करताना ते आरतीप्रमाणे लावलं जातं.

लतादीदीच्या निधनानंतर देशमुख यांनी पहिल्या जयंतीला घरात मंदिर बनवलं. त्यात दीदींची मूर्ती विराजमान असून हार, फुलं वाहून, उदबत्ती लावून पूजाही केली जाते. घरात स्वर देवतेच्या रुपात लतादीदींची रोज पूजा केली जाते, असं देशमुख सांगतात.

राजीव यांच्या आयुष्यातला एक किस्सा असा आहे की ते अवघ्या 7 व्या वर्गात असताना शाळेतूनच दीदींना मुबई येथे भेटण्यासाठी निघाले होते. मात्र, आरपीएफ जवानांनी सातव्या वर्गातील देशमुख यांना एकटा बघून थेट घरी आणून सोडलं होतं. तरीही लतादीदींना भेटण्याची इच्छा काही कमी झाली नाही.

पुन्हा 12 वीला असताना 1982 मध्ये एकटेच मुंबईत दीदींना भेटण्यासाठी गेले. तेव्हा दीदी या परदेशी गेल्या होत्या. त्यामुळे तेव्हाही भेट झाली नाही. त्यानंतर 1987 साली पुणे येथे एका कॉन्सर्ट मध्ये लता दीदींना भेटण्याची संधी मिळालीच. तेव्हा त्यांना जग जिंकल्यासारखं वाटलं. तो फोटोही देशमुख यांनी अगदी जपून ठेवलाय.

राजीव देशमुख यांच्या पत्नी शुभांगी देखमुख यांनी लतादीदींचे सरस्वती देवीच्या रुपात पोस्टर तयार केले आहे. घरात येणाऱ्या प्रत्येकाचे लक्ष वेधून घेईल असे हे पोस्टर आहे. लता दीदी या आमच्यासाठी देवाप्रमाणे आहेत. तसेच तो आवाज पुन्हा होणे शक्य नाही. त्यामुळे स्वर देवतेचा आवाज असणाऱ्या लतादीदींना सरस्वती देवीच्या रूपात पोस्टरच्या माध्यमातून सादर केले आहे, असे शुभांगी सांगतात.