Women Success Story: पारंपरिकतेला आधुनिकतेची दिली जोड, सुरू केला हॅन्डक्राफ्ट व्यवसाय, कमाई लाखात

पारंपरिकतेला आधुनिकतेची जोड देत, जुन्या संस्कृतीला नव्या रूपात सादर करणारे उपक्रम सध्या वाढताना दिसत आहेत. असाच एक आगळावेगळा व्यवसाय पुण्यातील गौतमी आहेर या तरुणीने सुरू केला आहे. पारंपरिक खण या मराठमोळ्या कापडापासून विविध प्रकारच्या आकर्षक आणि उपयुक्त वस्तू तयार करत, तिने तेशा हॅन्डक्राफ्ट या नावाने स्वतःचा व्यवसाय सुरू केला आहे.

गौतमी आहेर यांचं शिक्षण कॉम्प्युटर इंजिनिअरिंग झालं असून त्यांना होम डेकोरची विशेष आवड आहे. तीन वर्षांपूर्वी एका कार्यक्रमात सहभागी झाल्यानंतर त्यांनी या व्यवसायाची संकल्पना ठरवली. त्या कार्यक्रमात सर्वच गोष्टी आधुनिक होत्या आणि केवळ एकच खणाचं कापड वापरलेलं होतं. ते पाहून त्यांच्या मनात विचार आला की, आपण आपल्या परंपरेपासून दूर जात आहोत. त्यामुळे त्या क्षणीच त्यांनी ठरवलं की पारंपरिक गोष्टींना नव्याने सादर करता येईल का, यावर प्रयोग करायचे.

सुरुवातीला काही वस्तू स्वतः तयार करून पाहिल्या. त्यानंतर तीन वर्षांपूर्वी तेशा हॅन्डक्राफ्ट नावाने कन्हैया शॉप, दगडूशेठ गणपती मंदिराजवळ एक छोटं वर्कशॉप सुरू केलं. आज या वर्कशॉपमध्ये सात महिला एकत्र काम करत असून सर्व वस्तू हाताने आणि पारंपरिक खणाच्या कापडातून तयार केल्या जातात.

या वस्तूंमध्ये कमळ आसन, पान आसन, शुभ चिन्ह असलेली आसनं, तसेच खणाच्या टोप्या, हॅन्डपेन्टेड फ्रेम्स, पर्स, हळदीकुंकवाची करंडं, तोरणं यांचा समावेश होतो. विशेष म्हणजे, या सर्व वस्तू ग्राहकांच्या आवडीनुसार कस्टमाइज करून दिल्या जातात. हव्या त्या रंगात, साईझमध्ये आणि डिझाइननुसार ग्राहकांना ऑर्डरप्रमाणे तयार करून मिळतात.

गणपती उत्सवाच्या पार्श्वभूमीवर या वस्तूंना मोठ्या प्रमाणावर मागणी वाढली आहे. साधारणतः 100 रुपयांपासून वस्तूंची किंमत सुरू होते आणि 25 पेक्षा अधिक प्रकारच्या व्हरायटी इथे पाहायला मिळतात. यामधून त्यांना महिन्याला 1 लाख कमाई होत आहे.

गौतमी सांगतात, आधुनिक जीवनशैलीत पारंपरिक वस्तू हरवत चालल्या आहेत. त्या पुन्हा एकदा घराघरात पोहोचवण्याचा माझा प्रयत्न आहे. खण हे केवळ साडीपुरते मर्यादित न ठेवता, त्याचा उपयोग घरसजावटीसाठी आणि विविध उपयुक्त वस्तूंमध्ये करून आपण परंपरेला नव्या रूपात जगू शकतो.

या उपक्रमामुळे अनेक महिलांना रोजगारही मिळाला आहे आणि घरबसल्या आर्थिक स्वावलंबनाची संधी मिळाली आहे. ग्राहकांकडून मिळणारा उत्स्फूर्त प्रतिसाद आणि कौतुक हेच गौतमीसाठी सर्वात मोठं यश ठरत आहे.