रोख रकमेनं रेंट भरता? सावधान! तुम्हाला Income Tax धाडेल नोटीस, वाचा संपूर्ण नियम

आजकाल ऑनलाईन पेमेंट जमाना आहे, असं असलं तरीसुद्धा काहीवेळा घरमालक किंवा अजूनही काही ठिकाणी रोख रकम देऊनच घराचं भाडं भरलं जातं. अजूनही व्यावसायिक जागेचं भाडंसुद्धा कॅशमध्ये दिलं जातं. तुम्ही अशा पद्धतीनं जर भाडं भरत असाल तर तुमच्यासाठी महत्त्वाची बातमी आहे. ही सवय भविष्यात तुमच्यासाठी मोठी समस्या निर्माण करू शकते आणि तुम्हाला थेट आयकर विभागाकडून नोटीस येऊ शकते.

आयकर विभाग तुमच्या उत्पन्नामध्ये आणि खर्चामध्ये विसंगती दिसल्यास नोटीस पाठवते. तुम्ही जेव्हा भाड्याचे पेमेंट रोखीत करता, तेव्हा तुमच्याकडे कोणताही ठोस व्यवस्थित डिजिटल पुरावा राहत नाही. अशा वेळी, तुमच्या खर्चाचा आणि कमाईचा ताळमेळ बसत नाही आणि तुम्ही आयकर विभागाच्या रडारवर येण्याची शक्यता वाढते.

नोटीस टाळण्यासाठी काय करावे?- विशेषज्ञ स्पष्ट सल्ला देतात की, आयकर विभागाच्या नोटीसपासून सुरक्षित राहायचे असेल तर भाड्याचे पेमेंट नेहमीच पारदर्शक पद्धतीने करावे:

डिजिटल पेमेंट करा: भाड्याचे पेमेंट नेहमी चेक, बँक ट्रान्सफर किंवा UPI सारख्या डिजिटल माध्यमांतूनच करा. यामुळे तुमच्याकडे प्रत्येक पेमेंटचा व्यवस्थित आणि प्रमाणित पुरावा उपलब्ध राहील.

दस्तावेज जपून ठेवा: नोटीस आल्यास घाबरण्याची गरज नाही. तुमच्याकडे भाडेकरार (Rent Agreement), पेमेंटची पावती आणि सर्वात महत्त्वाचे म्हणजे घरमालकाच्या पॅन कार्डची माहिती असणे आवश्यक आहे.

जर तुमच्या घराचे भाडे दरमहा ₹५०,००० पेक्षा जास्त असेल, तर भाड्यावर टीडीएस (TDS) कापणे कायद्यानुसार अनिवार्य होते. यासाठी घरमालक आणि भाडेकरू या दोघांचीही ओळख आणि आर्थिक माहिती जमा करावी लागते.

यामुळे, मोठ्या भाड्याच्या व्यवहारांमध्ये तर रोख पेमेंट करणे अत्यंत धोकादायक ठरते. डिजिटल माध्यमांचा वापर केल्यास तुमचा व्यवहार कायदेशीर आणि पारदर्शक राहतो. हा नियम पाळणे म्हणजे फक्त दंड टाळणे नव्हे, तर तुमच्या आर्थिक व्यवहारात पारदर्शकता राखणे आहे. तुम्हीही भाडे रोखीत देत असाल, तर तात्काळ डिजिटल पेमेंटचा पर्याय निवडा, जेणेकरून तुम्ही आयकर विभागाच्या रडारवर येण्यापासून सुरक्षित राहाल.