जळगाव सुवर्ण नगरीत मोठा उलटफेर! रातोरात 10 हजार रुपयांनी महाग, चांदी 3,03,850 रुपये, सोन्याचे दर पाहून बसेल धक्का

जळगाव, नितीन नांदुरकर: देशाची सुवर्ण नगरी म्हणून ओळखल्या जाणाऱ्या जळगावच्या सराफ बाजारात आज सोन्या-चांदीच्या दरांनी ऐतिहासिक उसळी घेतली आहे. सोन्याच्या दरात एकाच दिवसात तब्बल २ हजार रुपयांची वाढ झाली आहे, तर चांदीने तर साऱ्यांच्याच कल्पनेपलीकडचा टप्पा गाठला आहे.

चांदीच्या दरात १० हजार रुपयांची विक्रमी वाढ झाल्याने, आता चांदी चक्क ३ लाखांच्या पार पोहोचली आहे. आज जळगावच्या बाजारपेठेत सोन्या-चांदीचा भाव ऐकून ग्राहकांना घाम फुटला आहे. ऐन सलग्न सराईत ही दरवाढ खूप मोठी आहे. त्यामुळे ग्राहकांना दागिने खरेदी करायचे कसे असा प्रश्न पडलाय.

सोन्याचे दर 1 लाख 48 हजार रुपयांवर पोहोचले आहेत. तर चांदीचे दर 3 लाख 3 हजार रुपयांवर पोहोचले आहेत. दागिन्यांपेक्षा आता लोक ऑनलाईन गुंतवणुकीकडे वाटचाल करत आहेत. हे दर आणखी वाढण्याची शक्यता आहे.

सराफ व्यावसायिकांनी दिलेल्या माहितीनुसार, या दरवाढीमागे प्रामुख्याने तीन मोठी कारणे आहेत. आंतरराष्ट्रीय अस्थिरता: डॉलरमधील चढउतार आणि जागतिक बाजारातील सोन्याची वाढती मागणी. लग्नसराईचा हंगाम हे दुसरं महत्त्वाचं कारण आहे.

सध्या लग्नसराई जोरात असल्याने मागणीत प्रचंड वाढ झाली आहे. तिसरं म्हणजे गुंतवणूक, सुरक्षित गुंतवणूक म्हणून मोठ्या गुंतवणूकदारांनी सोन्या-चांदीकडे वळवलेला मोर्चा आहे. ETF, सिल्वर बॉन्ड यामध्ये लोक गुंतवणूक करत आहेत.

जळगाव सराफ बाजारात एरवी दागिन्यांच्या खरेदीसाठी मोठी गर्दी असते. मात्र, सोन्याचे दर दीड लाखाच्या जवळ पोहोचल्याने आणि चांदीने ३ लाखांचा आकडा पार केल्याने सामान्य ग्राहकांचे बजेट पूर्णपणे कोलमडले आहे. अनेक ग्राहकांनी आता आपली खरेदी पुढे ढकलली आहे.