Silver Price 2026: चांदीच्या किमतीत होणार मोठी उलथापालथ! 500000 लाखांवर जाणार दर? तज्ज्ञांनी व्यक्त केली भीती

२०२६ च्या सुरुवातीला चांदीने गुंतवणूकदारांना मालामाल केले होते, मात्र ही तेजी फार काळ टिकू शकली नाही. जानेवारीच्या सुरुवातीला चांदीने प्रति औंस १२१ डॉलरचा टप्पा ओलांडून नवा विक्रम प्रस्थापित केला होता. महागाईची भीती आणि जागतिक आर्थिक अस्थिरतेमुळे गुंतवणूकदारांनी चांदीमध्ये सुरक्षित गुंतवणूक म्हणून मोठ्या प्रमाणावर पैसा ओतला. यामुळे कॉमेक्स एक्सचेंजवर ट्रेडिंगचा वॉल्यूम आणि ईटीएफ मधील गुंतवणूक अभूतपूर्व पातळीवर पोहोचली होती.

न्यूज 18 हिंदीने दिलेल्या वृत्तानुसार, चांदीच्या किमतीतील ही स्वप्नवत वाटणारी तेजी ३० जानेवारी २०२६ रोजी एका मोठ्या धक्क्याने ओसरली. या दिवशी चांदीच्या किमतीत तब्बल ३० टक्क्यांहून अधिक घसरण झाली, जी बाजाराच्या इतिहासातील आतापर्यंतची सर्वात मोठी एकदिवसीय घसरण ठरली. फेब्रुवारीच्या सुरुवातीला चांदीचा भाव ८८ डॉलर प्रति औंसपर्यंत खाली आला. विशेष म्हणजे, ही घसरण चांदीची मागणी कमी झाल्यामुळे नव्हे, तर अमेरिकेतील राजकीय घडामोडींमुळे झाली.

अमेरिकेचे राष्ट्राध्यक्ष डोनाल्ड ट्रम्प यांनी केविन वॉर्श यांची 'फेडरल रिझर्व्ह'च्या अध्यक्षपदी निवड करण्याची घोषणा केली आणि बाजाराचे चित्र पालटले. या निर्णयामुळे गुंतवणूकदारांना धोरणात्मक स्थैर्याचा विश्वास मिळाला, परिणामी डॉलर मजबूत झाला आणि ट्रेझरी यील्डमध्ये वाढ झाली. डॉलर वधारल्याने परदेशी खरेदीदारांसाठी चांदी महाग झाली आणि गुंतवणूकदारांनी सुरक्षित मालमत्तांमधून पैसे काढून पुन्हा डॉलरमध्ये गुंतवण्यास सुरुवात केली. यामुळे चांदीच्या वायदा बाजारात मोठ्या प्रमाणावर बिकवाली झाली आणि किमती गडगडल्या.

किमतीत चढ-उतार होत असले तरी, चांदीची औद्योगिक मागणी आजही भक्कम आहे. सौर पॅनेल, इलेक्ट्रिक वाहने, सेमीकंडक्टर आणि वैद्यकीय उपकरणे यांमध्ये चांदीचा मोठ्या प्रमाणावर वापर होतो. २०२६ मध्ये शेअर बाजारातील मोठ्या कंपन्यांचे शेअर्स कोसळलेले असतानाही, चांदीने आतापर्यंत १२ टक्क्यांहून अधिक परतावा दिला आहे, जो 'एस अँड पी ५०० च्या तुलनेत कितीतरी पटीने जास्त आहे.

सध्याच्या परिस्थितीत चांदीची किंमत २०० डॉलर प्रति औंसपर्यंत पोहोचेल का, यावर मोठी चर्चा सुरू आहे. विश्लेषकांच्या मते, ही किंमत गाठण्यासाठी सध्याच्या किमती दुप्पट व्हाव्या लागतील, जे सामान्य स्थितीत कठीण वाटते. मात्र, जर जागतिक पुरवठा साखळी विस्कळीत झाली किंवा किरकोळ गुंतवणूकदारांची सट्टेबाजी वाढली, तर अत्यंत टोकाच्या परिस्थितीत एक किलो चांदीचा भाव ५ लाख रुपयांच्या पुढे जाऊ शकतो. सध्या तरी ही किंमत प्रति किलो ३ ते ४ लाख रुपयांच्या दरम्यान स्थिरावण्याची शक्यता अधिक आहे.

अनेकांनी आयशेअर्स सिल्वर ट्रस्ट सारख्या ईटीएफच्या माध्यमातून गुंतवणूक केली आहे. २०२६ मध्ये या फंडांनी चांगला परतावा दिला असला, तरी जानेवारीतील घसरणीने यातील जोखीम स्पष्ट केली आहे. चांदीमध्ये गुंतवणूक करताना ती केवळ दीर्घकालीन हेतूने किंवा जोखमीपासून बचाव करण्यासाठी करावी, असा सल्ला तज्ज्ञ देतात. चांदीच्या किमतीतील प्रचंड अस्थिरता पाहता, वेळेचे गणित चुकल्यास गुंतवणूकदारांना मोठा फटका बसू शकतो.