Weather Alert: महाराष्ट्रात पुन्हा वादळी वाऱ्यासह पाऊस, आता 5 जिल्ह्यांना हायअलर्ट

राज्यात 9 सप्टेंबर मंगळवार रोजी विविध भागांमध्ये हलक्या ते मध्यम स्वरूपाच्या पावसाची शक्यता असल्याचे हवामान विभागाने सांगितले आहे. विदर्भातील काही जिल्ह्यांत मुसळधार पावसाचा इशारा देण्यात आला आहे, तर काही ठिकाणी हलका पाऊस पडण्याची शक्यता आहे. कोकण, मध्य महाराष्ट्र आणि मराठवाड्यातून पावसाने काढता पाय घेतल्याचे दिसून येत आहे. पाहुयात, 9 सप्टेंबर रोजी राज्यातील हवामानाची स्थिती कशी राहील.

कोकण आणि मुंबई परिसरात पावसाचा जोर कमी झालेला दिसून येत आहे. पालघर, ठाणे, मुंबई, रायगड, रत्नागिरी आणि सिंधुदुर्ग या जिल्ह्यांत मध्यम स्वरूपाचा पाऊस पडण्याची शक्यता असल्याचं हवामान विभागाकडून सांगण्यात आलं आहे.

पश्चिम महाराष्ट्रातील पुणे, कोल्हापूर, सातारा, सांगली आणि सोलापूर या जिल्ह्यांत हलका पाऊस पडण्याची शक्यता आहे. मात्र, पुणे, कोल्हापूर आणि सातारा या जिल्ह्यांच्या घाटमाथा परिसरात मध्यम स्वरूपाचा पाऊस होण्याचा अंदाज आहे.

मराठवाड्यातून पावसाने काढता पाय घेतला आहे. छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत ढगांच्या गडगडाटासह हलका ते मध्यम पाऊस पडण्याची शक्यता वर्तवण्यात आली आहे.

उत्तर महाराष्ट्रातील धुळे, नंदुरबार, जळगाव, नाशिक आणि अहिल्यानगर या जिल्ह्यांत हलका ते मध्यम स्वरूपाचा पाऊस होण्याची शक्यता आहे. गेल्या काही दिवसांत उत्तर महाराष्ट्रातील जिल्ह्यांत मुसळधार पाऊस झालाय. आता तेथील जिल्ह्यांना पावसाने उघडीप दिली आहे.

विदर्भातील काही जिल्ह्यांत मुसळधार पावसाची शक्यता वर्तवण्यात आली आहे. भंडारा, चंद्रपूर, गोंदिया, गडचिरोली आणि नागपूर जिल्ह्यांत विजांच्या कडकडाटासह आणि वादळी वाऱ्यासह मुसळधार पावसाची शक्यता वर्तवली आहे. या जिल्ह्यांना पावसाचा यलो अलर्ट देण्यात आला आहे, तर अकोला, अमरावती, बुलढाणा, वाशिम आणि यवतमाळ या जिल्ह्यांत कुठलाही पावसाचा इशारा देण्यात आलेला नाही.

एकूणच, 9 सप्टेंबर रोजी विदर्भातील काही जिल्ह्यांमध्ये पावसाचा जोर अधिक राहणार असल्याची माहिती हवामान विभागानं दिली आहे, तर कोकण, पश्चिम महाराष्ट्र आणि मराठवाडा या भागांमध्ये हलक्या ते मध्यम स्वरूपाचा पाऊस पडण्याची शक्यता आहे. ज्या जिल्ह्यांत पावसाची शक्यता आहे, तेथील नागरिकांनी काळजी घेणे गरजेचे आहे.