Weather Alert : महाराष्ट्रात काही ठिकाणी विजा कडाडणार, पाऊस कोसळणार, पुढील 24 तास या जिल्ह्यांसाठी धोक्याचे!

राज्यातील वातावरणात सतत बदल होताना दिसून येत आहे. काही जिल्ह्यांत उन्हाचे चटके नागरिकांना सोसावे लागत आहेत. तर काही ठिकाणी हलका पाऊस पडतोय. कोकण, पश्चिम महाराष्ट्र आणि उत्तर महाराष्ट्रातील काही भागांमध्ये 19 ऑक्टोबर रोजी विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. तर विदर्भ आणि मराठवाड्यात बहुतांश भागात कोरडे वातावरण राहण्याचा अंदाज आहे. पाहुयात, 19 ऑक्टोबर रोजी राज्यातील हवामानाची स्थिती कशी राहील.

मुंबईतील कमाल तापमान 36 अंश सेल्सिअस तर किमान तापमान 24 अंश सेल्सिअस इतके राहण्याचा अंदाज आहे. मुंबई, पालघर आणि ठाणे या ठिकाणी कोरडे आणि अंशतः ढगाळ वातावरण राहण्याची शक्यता आहे. तर रायगड आणि सिंधुदुर्ग जिल्ह्यात वादळी वाऱ्यासह आणि विजांच्या कडकडाटासह हलक्या ते मध्यम पावसाची शक्यता हवामान खात्याने व्यक्त केली आहे. या भागासाठी यलो अलर्ट जारी करण्यात आला आहे. तसेच रत्नागिरी जिल्ह्यांत ढगांच्या गडगडाटासह हलक्या ते मध्यम स्वरूपाच्या पावसाची शक्यता आहे.

पश्चिम महाराष्ट्रातील पुणे, कोल्हापूर, सातारा आणि घाटमाथा परिसरात वादळी वाऱ्यासह आणि विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. याठिकाणी पावसाचा यलो अलर्ट देण्यात आला आहे. सांगली आणि सोलापूर जिल्ह्यांत ढगांच्या गडगडाटासह हलक्या पावसाची शक्यता आहे. पुण्यातील कमाल तापमान 32 अंश सेल्सिअस तर किमान तापमान 20 अंश सेल्सिअस इतके राहण्याची शक्यता आहे.

मराठवाड्यातील छत्रपती संभाजीनगर, जालना, परभणी, बीड आणि हिंगोली येथे कोरडे वातावरण राहण्याचा अंदाज आहे. तर नांदेड, लातूर आणि धाराशिव जिल्ह्यांत ढगांच्या गडगडाटासह हलक्या पावसाची शक्यता व्यक्त करण्यात आली आहे. छत्रपती संभाजीनगर मधील कमाल तापमान 34 अंश सेल्सिअस तर किमान तापमान 20 अंश सेल्सिअस इतके राहण्याचा अंदाज आहे.

उत्तर महाराष्ट्रातील धुळे, नंदुरबार आणि जळगाव जिल्ह्यांत कोरडे वातावरण राहण्याचा अंदाज आहे. नाशिक आणि घाटमाथा परिसरात ढगांच्या गडगडाटासह हलक्या पावसाची शक्यता आहे. तर अहिल्यानगर जिल्ह्यात विजांच्या कडकडाटासह वादळी वाऱ्यांसह हलक्या ते मध्यम पावसाचा इशारा देण्यात आला आहे. अहिल्यानगरसाठी यलो अलर्ट जारी करण्यात आला आहे. नाशिकमधील कमाल तापमान 33 अंश सेल्सिअस तर किमान तापमान 22 अंश सेल्सिअस इतकं असू शकतं.

विदर्भातील अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ जिल्ह्यांत कोरडे आणि उष्ण वातावरण राहण्याचा अंदाज आहे. नागपूरमधील कमाल तापमान 33 अंश सेल्सिअस तर किमान तापमान 22 अंश सेल्सिअस इतकं असू शकतं.

19 ऑक्टोबर रोजी राज्यात संमिश्र वातावरण बघायला मिळण्याची शक्यता आहे. काही भागांत वादळी वाऱ्यासह पावसाची शक्यता आहे. तर काही भागांत वातावरण कोरडे राहणार आहे. वातावरणात सतत बदल होत असल्याने नागरिकांनी काळजी घेणे आवश्यक आहे.