T20 World Cup : टीम इंडिया सुपर-8 मध्ये, पाकिस्तानचं पॅक अप? एका जागेसाठी तिघांमध्ये फाईट!

रविवारी टीम इंडियाने पाकिस्तानवर 61 रननी दणदणीत विजय मिळवला, याचसोबत भारतीय टीम ग्रुप ए मधून सुपर-8 मध्ये प्रवेश करणारी पहिली टीम ठरली आहे. पण दुसरीकडे पाकिस्तानसमोर मात्र नवीन संकट ओढावलं आहे.

भारताविरुद्ध एवढा मोठा पराभव झाल्यामुळे पाकिस्तानच्या नेट रनरेटलाही हादरा बसला आहे. ग्रुप ए च्या पॉईंट्स टेबलमध्ये पाकिस्तान तिसऱ्या क्रमांकावर फेकली गेली आहे. पाकिस्तानचे 3 सामन्यांमध्ये 2 विजय आणि एक पराभवासह 4 पॉईंट्स आहेत, पण त्यांचा नेट रन रेट हा मायनस 0.403 आहे.

दुसरीकडे ग्रुप ए मध्ये युएसएची टीम दुसऱ्या क्रमांकावर आहे. ग्रुप स्टेजमध्ये युएसएचे सर्व 4 सामने झाले आहेत, यात त्यांनी 2 विजय मिळवले असून 2 सामन्यांमध्ये त्यांचा पराभव झाला. युएसएचा नेट रनरेट हा +0.787 आहे, म्हणजेच पाकिस्तानपेक्षा चांगला आहे.

पाकिस्तानला सुपर-8 मध्ये प्रवेश करायचा असेल तर त्यांना आता 18 फेब्रुवारीला नामिबियाविरुद्ध होणाऱ्या सामन्यात विजय मिळवावाच लागणार आहे. या सामन्यात पाकिस्तानचा पराभव झाला तर त्यांचं आव्हान ग्रुप स्टेजलाच संपुष्टात येईल.

नामिबियाने पाकिस्तानला पराभूत केलं तर युएसएची सुपर-8 मध्ये प्रवेश करण्याची शक्यता सर्वाधिक आहे, कारण त्यांचा नेट रनरेट हा प्लसमध्ये आहे. दुसरीकडे नेदरलँडलाही सुपर-8 मध्ये प्रवेश करण्यासाभठी आणखी एक संधी मिळेल.

भारत आणि नेदरलँड यांच्यात 19 फेब्रुवारीला सामना होणार आहे, या सामन्यात नेदरलँडने भारताचा मोठ्या फरकाने पराभव केला, तर त्यांना सुपर-8 मध्ये प्रवेश करण्याची संधी मिळेल. नेदरलँडचा नेट रनरेट हा -1.352 एवढा आहे, त्यामुळे सध्या तरी त्यांचं टीम इंडियाला हरवणं तेही मोठ्या फरकाने सध्या तरी अशक्य वाटत आहे.