ऑस्ट्रेलिया वर्ल्ड कपमधून बाहेर, एक बॉल ही न खेळता झिम्बाब्वे सुपर-8 मध्ये; बलाढ्य कांगारूंचं वस्त्रहरण!

सुपर-8 मध्ये प्रवेश करण्यासाठी या सामन्यात आयर्लंडच्या विजयासाठी ऑस्ट्रेलिया प्रार्थना करत होती, पण केन्डीच्या पॅलकेल्लीमध्ये सकाळपासूनच पाऊस सुरू होता, त्यामुळे मॅचमध्ये एकही बॉल टाकला गेला नाही.

ग्रुप बी मध्ये असलेल्या ऑस्ट्रेलियाचा यंदाच्या वर्ल्ड कपच्या ग्रुप स्टेजमध्ये झिम्बाब्वे आणि श्रीलंकेविरुद्ध पराभव झाला होता, त्यामुळे त्यांचा सुपर-8 ला पोहोचण्याचा मार्ग खडतर झाला होता. ऑस्ट्रेलियासाठी सुपर-8 चं आव्हान कायम ठेवण्यासाठी आयर्लंडविरुद्ध झिम्बाब्वेचा पराभव होणं गरजेचं होतं.

झिम्बाब्वेचा आयर्लंडविरुद्ध पराभव झाला असता आणि ऑस्ट्रेलियाने ओमानला मोठ्या फरकाने हरवलं असतं, तर ऑस्ट्रेलिया सुपर-8 मध्ये पोहोचली असती, पण आयर्लंड-झिम्बाब्वेचा सामना पावसामुळे रद्द झाल्याने आता झिम्बाब्वे सुपर-8 मध्ये पोहोचली आहे आणि ऑस्ट्रेलियाचं आव्हान संपुष्टात आलं आहे.

झिम्बाब्वेने ग्रुप स्टेजमध्ये 3 पैकी 2 सामने जिंकले तर त्यांचा एक सामना पावसामुळे रद्द झाला, त्यामुळे झिम्बाब्वेच्या खात्यात 3 सामन्यांमध्ये 5 पॉईंट्स झाले आहेत, तसंच त्यांचा श्रीलंकेविरुद्धचा एक सामना शिल्लक आहे, पण त्या सामन्याला आता अर्थ उरला नाही.

दुसरीकडे ऑस्ट्रेलियाने ओमानविरुद्ध कितीही मोठा विजय मिळवला तरी त्यांचे जास्तीत जास्त 4 पॉईंट्स होतील, पण झिम्बाब्वेचे आधीच 5 पॉईंट्स झाल्यामुळे ऑस्ट्रेलियाला ओमानविरुद्धच्या सामन्यानंतर घरी परत जावं लागणार आहे.