नगर-कल्याण रोडवर बिबट्याचा धसका
मिळालेल्या माहितीनुसार, निलेश सीताराम डोके हे घरी जात असताना रस्त्याच्या कडेला दबा धरून बसलेल्या बिबट्याने त्यांच्या मोटरसायकलला जोरदार धडक दिली. याच अपघातात ते गंभीर जखमी झाले. त्यांच्या डोक्याला मोठ्या प्रमाणात दुखापत झाली असून स्थानिक नागरिकांच्या मदतीने त्यांना लगेच आळेफाटा येथील खाजगी रुग्णालयात उपचारासाठी नेण्यात आले.
बिबट्याच्या हल्ल्यामुळे परिसरात दहशत
advertisement
घटनेचे सीसीटीव्ही फुटेज देखील उपलब्ध आहे. प्रत्यक्षदर्शींनी सांगितले की बिबट्याने धडक दिल्यानंतर तिथून पळ काढला. ही घटना पाहून नागरिकांमध्ये भीती पसरली आहे. विशेषतः ओतूर-जुन्नर परिसरात गेल्या काही दिवसांपासून बिबट्यांचे प्रमाण वाढले असल्याने शेतकरी आणि रहिवासी भयभीत झालेले आहेत.
स्थानिक शेतकऱ्यांनी वनविभागाकडे तात्काळ पिंजरा लावून बिबट्याला पकडण्याची मागणी केली आहे. घडलेल्या घटनेनंतर वनविभागानेही घटनास्थळी तातडीने जाऊन परिस्थिती पाहण्याचे आदेश दिले आहेत. नागरिकांनी या भागात सावधगिरी बाळगावी आणि रस्त्यावर विशेष काळजी घ्यावी असे सांगितले जात आहे.