TRENDING:
म्हाडाच्या या 4 हजार 186 घरांसाठी तब्बल 2 लाख 15 हजार 965 नागरिकांनी अर्ज केले आहेत. पुणे मंडळाकडून या घरांच्या सोडतीची जाहिरात मागील वर्षी 11 सप्टेंबर 2025 रोजी प्रसिद्ध करण्यात आली होती. या सोडतीमध्ये पुणे आणि पिंपरी-चिंचवड महापालिका क्षेत्रासह पुणे महानगर प्रदेश विकास प्राधिकरणाच्या हद्दीतील घरे समाविष्ट आहेत. यामध्ये 20 टक्के सर्वसमावेशक गृहनिर्माण योजनेतील 3 हजार 322 सदनिका आणि 15 टक्के सामाजिक गृहनिर्माण योजनेतील 864 सदनिकांचा समावेश करण्यात आला आहे.
advertisement
म्हाडाकडून दोन वेळा मुदतवाढ
अर्जदारांना अर्ज भरताना येणाऱ्या अडचणी लक्षात घेऊन म्हाडाकडून दोन वेळा मुदतवाढ देण्यात आली होती. त्यानंतर निवडणूक आचारसंहिता लागू झाल्याने घरांची सोडत पुढे ढकलण्यात आली. सुरुवातीला डिसेंबरमध्ये सोडत होण्याची शक्यता होती. मात्र, महापालिका निवडणुका जाहीर झाल्याने हा निर्णय रखडला. सोडत घेण्यासाठी म्हाडाने राज्य निवडणूक आयोगाकडे परवानगी मागितली होती. मात्र, यामुळे मतदारांवर परिणाम होऊ शकतो, असे सांगत आयोगाने परवानगी नाकारली. अखेर जिल्हा परिषद निवडणुकांची आचारसंहिता संपल्यानंतर येत्या मंगळवारी ही सोडत होणार आहे.
अखेर प्रतीक्षा संपली
म्हाडा घरांच्या सोडतीला नागरिकांकडून मोठा प्रतिसाद मिळाला आहे. या सोडतीसाठी 2 लाख 15 हजार 965 जणांनी अर्ज केले असून, अनामत रकमेच्या स्वरूपात सुमारे 488 कोटी रुपयांची रक्कम जमा झाली आहे. सप्टेंबर 2025 पासून ही रक्कम म्हाडाकडेच अडकून असल्याने, सोडत नेमकी कधी होणार, याबाबत अर्जदारांकडून वारंवार विचारणा केली जात होती.
घरबसल्या पाहा निकालाचे थेट प्रक्षेपण
अर्जदारांची गर्दी टाळण्यासाठी म्हाडाकडून सोडतीचे थेट ऑनलाईन प्रक्षेपण करण्यात येणार आहे. अर्जदारांना ही सोडत घरबसल्या पाहता येणार असून, दुपारी 12 वाजल्यापासून म्हाडाच्या अधिकृत यूट्यूब चॅनेलवर सोडत थेट दाखवली जाणार आहे. यासोबतच पात्र अर्जदारांना निकाल पाहण्यासाठीची लिंक त्यांच्या नोंदणीकृत मोबाईल क्रमांकावर एसएमएसद्वारे पाठवण्यात आली आहे. निवडणूक आचारसंहिता आणि तांत्रिक अडचणींमुळे दोन वेळा पुढे ढकलण्यात आली होती. पण आता अखेर प्रतीक्षा संपली आहे.