जुनं दुखणं समोर, मुरलीधर मोहोळ यांच्यावर शस्त्रक्रिया, एक महिना विश्रांती; नेमकं काय झालं?

मुरलीधर मोहोळ यांनी सोशल मीडियाच्या माध्यमातून आपल्या शस्त्रक्रियेची माहिती दिली आहे. 29 वर्षांपूर्वी कोल्हापूर येथे कुस्ती खेळताना त्यांना गंभीर दुखापत झाली होती. याच दुखापतीमुळे त्यांचा कुस्तीचा प्रवास कायमचा थांबला आणि ते राजकारणात सक्रिय झाले. इतकी वर्षे या दुखण्याकडे दुर्लक्ष केले, परंतु आता हा त्रास असह्य झाल्याने डॉक्टरांनी तातडीने शस्त्रक्रियेचा सल्ला दिला. त्यानुसार ही शस्त्रक्रिया यशस्वीरीत्या पार पडली आहे.

advertisement

का करावी लागली शस्त्रक्रिया? 

सध्या संसदेचे अधिवेशन सुरू आहे. त्यातच पुण्यात यंदा 'महाराष्ट्र केसरी' कुस्ती स्पर्धेचे आयोजन होत आहे. अशा महत्त्वाच्या काळात विश्रांती घ्यावी लागल्याने मोहोळ यांनी खंत व्यक्त केली आहे. दुखापतीच्या त्रासापेक्षा संसदेचे अधिवेशन, लोकांशी असलेला संपर्क आणि महाराष्ट्र केसरी स्पर्धेला मुकावे लागल्याचा त्रास अधिक होतोय, अशा शब्दांत त्यांनी आपल्या भावना व्यक्त केल्या. जरी सध्या सक्तीची विश्रांती घ्यावी लागत असली, तरी लवकरच पूर्णपणे बरे होऊन पुन्हा एकदा नव्या जोमाने पुणेकरांच्या सेवेत रुजू होऊ, असा विश्वास त्यांनी व्यक्त केला आहे.