TRENDING:
पुणे विमानतळ प्रशासनाने घेतलेल्या या निर्णयामुळे प्रवाशांना अधिक सुविधा मिळणार असून, व्यवसाय, पर्यटन आणि औद्योगिक क्षेत्रालाही मोठा फायदा होणार आहे. तसेच पुण्याच्या विकासाला मोठ्या प्रमाणात चालना मिळणार असल्याचं प्रशासनाकडून सांगण्यात येतंय.
प्रवाशांना अधिक उड्डाणांचे पर्याय
advertisement
दिल्ली, बंगळुरू, चेन्नई, कोलकाता, गोवा, हैदराबाद, नागपूर, जयपूर आणि अहमदाबाद या प्रमुख शहरांसाठी पुणे विमानतळावर सर्वाधिक उड्डाणे सुरू आहेत. तसेच नांदेड, सिंधुदुर्ग, जळगाव आणि किशनगड यांसारख्या शहरांशी थेट विमानसेवा उपलब्ध करून देण्यात आल्याने प्रादेशिक कनेक्टिव्हिटीला मोठी चालना मिळाली आहे.
दरम्यान, आंतरराष्ट्रीय स्तरावर पुणे विमानतळ दुबई, बँकॉक आणि अबुधाबी या तीन महत्त्वाच्या शहरांशी थेट जोडलेला आहे. नागरी विमान वाहतूक महासंचालनालयाच्या (DGCA) निर्देशानुसार 29 मार्चपासून पुणे विमानतळावर उन्हाळी वेळापत्रक लागू करण्यात आले आहे.
नवीन मार्गांसह अतिरिक्त उड्डाणे
उन्हाळी वेळापत्रकात नव्या स्लॉटची भर पडल्याने पुणे विमानतळावरील स्लॉटची संख्या 235 पर्यंत वाढणार आहे. सध्या 216 स्लॉट वापरात असून उर्वरित स्लॉट्स विमान कंपन्यांना त्यांच्या विमानांची उपलब्धता आणि नियोजनानुसार देण्यात येणार आहेत.
स्पाइसजेटकडून कोलकाता मार्गावर, अकासा एअरकडून वाराणसीसाठी तर एअर इंडिया एक्स्प्रेसकडून बेंगळुरूसाठी लवकरच अतिरिक्त उड्डाणे सुरू होण्याची शक्यता आहे. याशिवाय एअर इंडियाने बागडोरा मार्गाचा समावेश केला असून स्टार एअरकडून सोलापूर-तिरुपती आणि फ्लाय 91 कडून मंगळुरू या मार्गांवरही सेवा सुरू करण्यात येणार आहे.
दरम्यान, विद्यमान मार्गांवरील उड्डाणांची संख्या वाढवण्याची प्रक्रिया सुरू असून यामुळे प्रवाशांना अधिक पर्याय आणि सुविधा मिळणार आहेत.