कल्याणीनगमध्ये पुन्हा ड्रिंक अँड ड्राईव्हचा थरार, धनिकाची अलिशान कार थेट हॉटेलमध्ये घुसली; एकाचा मृत्यू

समोर आलेल्या माहितीनुसार, कल्याणीनगर भागातील "टोईट" रेस्टॉरंटच्या बाहेर भीषण अपघात झाला आहे. या अपघातात व्हॅले पार्किंग असिस्टंटचा मृत्यू झाला आहे. व्हॅले पार्किंग काउंटरवर मद्यधुंद चालकाने गोंधळ देखील घातला. सत्येंद्र मंडल असे मृत्यू झालेल्या व्हॅले पार्किंग असिस्टंटचे नाव आहे. नशेत धुंद असलेल्या चालकाला पोलिसांनी ताब्यात घेतलं आहे. प्रताप असे चालकाचे नाव आहे.

advertisement

नेमका कसा झाला अपघात? 

पोलिसांनी दिलेल्या माहितीनुसार, पुण्यातील कल्याणीनगर भागात टोईट नावाचे एक रेस्टॉरंट आहे. दुपारच्या सुमारास मंडल हा याच रेस्टॉरंटमध्ये व्हॅले पार्किंग असिस्टंट म्हणून काम करतो. दुपारी 3.30 वाजण्याच्या सुमारास एका भरधाव वाहनाने या रेस्टॉरंटच्या पार्किंगमध्ये एन्ट्री केली. काही समजायच्या आत हे वाहन थेट व्हॅले पार्किंग काउंटरवर जाऊन धडकले. या ठिकाणी असलेल्या मंडल याला सुद्धा या वाहनाने उडवलं.

येरवडा पोलिस ठाण्यात याप्रकरणी गुन्हा दाखल

रक्ताच्या थारोळ्यात पडलेल्या मंडल याला रुग्णालयात दाखल करण्याचा प्रयत्न केला पण यात त्याचा मृत्यू झाला. पोलिसांनी घटनास्थळी धाव घेतली असून दारूच्या नशेत असलेल्या चालकाला ताब्यात घेतलं आहे. येरवडा पोलिस ठाण्यात याप्रकरणी गुन्हा दाखल करण्याची प्रक्रिया सुरू आहे.

कल्याणीनगर परिसरात संतापाची लाट

या घटनेमुळे कल्याणीनगर परिसरात संतापाची लाट उसळली आहे. स्थानिकांनी रात्रीच्या वेळी होत असलेल्या बेदरकार वाहनचालकांवर कठोर कारवाईची मागणी केली आहे. दरम्यान, पोलिसांनी अपघाताचा पुढील तपास सुरू केला असून, मद्यधुंद अवस्थेत वाहन चालवणे, निष्काळजीपणे वाहन चालवून मृत्यूस कारणीभूत ठरणे इत्यादी कलमांखाली याच्यावर गुन्हा दाखल करण्यात आला आहे.