'डॉक्टर, खूप त्रास होतोय'; सुमीत वेदनेनं विव्हळत होता, पण त्यांनी घरी हकललं, 15 मिनिटात मृत्यू, त्या पहाटे पुण्यात काय घडलं?

नेमकी घटना काय?

सुमीत सोनावणे (३२) हा वाडिया कॉलेजमध्ये शिपाई म्हणून कार्यरत होता. १८ जानेवारीच्या पहाटे ३:३० च्या सुमारास त्याच्या छातीत तीव्र वेदना सुरू झाल्या. काही महिन्यांपूर्वीच त्याच्या चुलत भावाचा हृदयविकाराने मृत्यू झाला असल्याने सुमीत घाबरला होता. त्याने आपल्या भावाला उठवले आणि तो औंध जिल्हा रुग्णालयात पोहोचला. तिथे डॉक्टरांनी त्याची 'ईसीजी' चाचणी केली आणि ती 'नॉर्मल' असल्याचे सांगत त्याला पित्ताचे इंजेक्शन देऊन घरी जाण्यास सांगितले.

advertisement

धमकावून घरी पाठवले: सुमीतच्या नातेवाइकांनी दिलेल्या माहितीनुसार, सुमीतला प्रचंड वेदना होत होत्या आणि तो भरती करून घेण्याची विनंती करत होता. मात्र, रुग्णालयातील कर्मचाऱ्यांनी "इतर रुग्णांना त्रास देऊ नका, शांतपणे घरी जा, नाहीतर सिक्युरिटी आणि पोलीस बोलावू," अशी धमकी दिली. अखेर हतबल होऊन भाऊ त्याला घरी घेऊन आला. घरी आल्यावर वॉशरूममधून बाहेर पडताच सुमीतला दोनदा जोरात खोकला आला आणि तो जमिनीवर कोसळला. त्याला पुन्हा रुग्णालयात नेले असता डॉक्टरांनी त्याला 'मृत' घोषित केले.

सुमीतच्या पश्चात त्याची वृद्ध आई आणि मोठा भाऊ विवेक आहे. सुमीतने स्वतःला फिट ठेवण्यासाठी अवघ्या १८ दिवसांपूर्वीच जिम जॉइन केली होती. "आमच्याकडे पैसे असते, तर आम्ही मोठ्या प्रायव्हेट हॉस्पिटलमध्ये गेलो असतो आणि आमचा भाऊ वाचला असता," अशी भावना सुमीतच्या काकांनी दीपक यांनी व्यक्त केली.

औंध जिल्हा रुग्णालयाचे जिल्हा शल्य चिकित्सक डॉ. नागनाथ यम्पल्ले यांनी या प्रकरणाच्या चौकशीसाठी तीन सदस्यीय समिती नेमली आहे. ही समिती त्या रात्री ड्युटीवर असलेले डॉक्टर, नर्स आणि सुरक्षा रक्षकांचे जबाब नोंदवणार आहे. सुमीतचा ईसीजी रिपोर्ट आणि त्याला दिलेली औषधे यांची पुन्हा पडताळणी केली जाईल.तसंच सांगवी पोलिसांनी हे प्रकरण ससून रुग्णालयाच्या वैद्यकीय मंडळाकडे तपासासाठी पाठवले आहे.