TRENDING:
पुणे-शिरूर महामार्गाचा होणार कायापालट
पुणे-शिरूर महामार्ग प्रकल्पाअंतर्गत वाघोली येथे विविध शासकीय विभागांच्या वरिष्ठ अधिकाऱ्यांनी नुकतीच संयुक्त पाहणी पार पडली. या प्रकल्पासाठी मेट्रो मार्गासाठी अंदाजे 3,666.24 कोटी रुपये तर 53.40 कि.मी. लांबीच्या 6 लेन उन्नत महामार्गासाठी सुमारे 7,515 कोटी रुपयांचा खर्च अपेक्षित आहे. हा प्रकल्प बीओटी (बिल्ड-ऑपरेट-ट्रान्सफर) पद्धतीने राबविण्याचे नियोजन करण्यात आले आहे. प्रस्तावित महामार्गावर अनेक अंडरपास, स्थानिक वाहतुकीसाठी स्वतंत्र एक्झिट मार्ग तसेच आधुनिक सुविधा असलेला रुंद मार्ग उभारला जाणार आहे. यामुळे परिसरातील वाहतूक सुलभ होईल आणि वाहतूक कोंडीचा प्रश्नही मोठ्या प्रमाणात मिटणार आहे.
advertisement
वाघोली येथे झालेल्या संयुक्त पाहणीदरम्यान रामवाडी ते वाघोली मेट्रो मार्गाच्या तांत्रिक बाबींचा सखोल आढावा घेण्यात आला. पुणे मेट्रोचे संचालक अतुल गाडगीळ आणि त्यांच्या पथकाने प्रस्तावित मार्गाची बारकाईने पाहणी केली. या बैठकीत वाहतूक पोलीस उपायुक्त हिम्मत जाधव, आमदार ज्ञानेश्वर कटके, महापारेषण विभागाचे वरिष्ठ अधिकारी तसेच नागरिक उपस्थित होते. पाहणीदरम्यान या प्रकल्पावर सर्व बाजूने चर्चा करण्यात आली आहे.
आमदार ज्ञानेश्वर कटके यांनी सांगितले की, यावर सविस्तर अहवाल सादर केला जाईल आणि लवकरच प्रकल्पाच्या कामाची सुरुवात केली जाईल. या प्रकल्पामुळे शिरूर-हवेली तालुक्यातील औद्योगिक क्षेत्र, आयटी कंपन्या तसेच एमआयडीसीला मोठी चालना मिळणार आहे. याशिवाय, पुणे-नगर मार्गावरील प्रवास अधिक वेगवान आणि सुरक्षित होऊन वेळ आणि इंधनाची बचत होईल.