TRENDING:
एका अवयवातून दोन रुग्णांचे प्राण वाचले
साधारणपणे एका दात्याचे यकृत एकाच रुग्णाला दिले जाते. मात्र, या प्रकरणात दात्याचे यकृत अत्यंत कार्यक्षम असल्याने तज्ज्ञ डॉक्टरांनी त्याचे दोन भाग करण्याचा निर्णय घेतला. यकृताचा एक भाग तीव्र यकृत निकामी झालेल्या सहा वर्षांच्या चिमुरड्यावर प्रत्यारोपित करण्यात आला, तर दुसरा मोठा भाग दीर्घकालीन यकृताच्या आजाराने त्रस्त असलेल्या ५८ वर्षीय रुग्णावर यशस्वीरीत्या बसवण्यात आला.
advertisement
डॉ. निनाद देशमुख आणि त्यांच्या पथकाने ही गुंतागुंतीची प्रक्रिया पार पाडली. यकृताचे दोन भाग करताना ते दोन्ही रुग्णांसाठी कार्यक्षम राहतील याची काळजी घेणे हे मोठे आव्हान होते. "दोन्ही रुग्ण सध्या उपचारांना चांगला प्रतिसाद देत असून त्यांची प्रकृती स्थिर आहे," अशी माहिती डॉ. देशमुख यांनी दिली.
एका अवयवातून दोन जीव वाचवल्यामुळे या शस्त्रक्रियेचे सर्वत्र कौतुक होत आहे. एका व्यक्तीचा मृत्यू झाला असला तरी त्याने केलेल्या अवयवदानामुळे ती व्यक्ती अनेक रूपात जिवंत राहू शकते, हेच या घटनेने पुन्हा एकदा अधोरेखित केले आहे.