शाळेतल्या किरकोळ वादातून पेटली खळबळ
मिळालेल्या माहितीनुसार, वडगाव मावळ येथील न्यू इंग्लिश स्कूलमध्ये दहावीत शिकणाऱ्या एका विद्यार्थ्याला शाळेतून सोडताना किरकोळ वाद निर्माण झाला. फिर्यादी अक्षय एकनाथ मोहिते यांचा चुलत भाऊ शाळेतून आरोपींच्या परिचयातील एका विद्यार्थिनीला घरी सोडून आला होता. त्यावरूनच आरोपी संतापले. या कारणावरून सौरभ रोहिदास वाघमारे, अभिजीत राजाराम ओव्हाळ, रणजित बाळासाहेब ओव्हाळ आणि प्रथमेश दिवे यांनी शाळेबाहेरून अक्षयच्या भावाला स्कॉर्पिओ गाडीत बसवून मारहाण केली. या घटनेनंतर दोन्ही गटांमध्ये बाचाबाची झाली.
advertisement
एकविरा चौकात पुन्हा धुमश्चक्री
प्रसंग इथेच थांबला नाही. त्यानंत संध्याकाळी साडेसहा वाजता अक्षय मोहिते आपल्या मित्रांसोबत एकविरा चौकात बसलेला असताना आरोपी पुन्हा तेथे आले. रणजित ओव्हाळ आणि प्रथमेश दिवे यांनी शिवीगाळ सुरू केली. त्यानंतर सौरभ वाघमारे आणि अभिषेक ओव्हाळ मोटरसायकलवर येऊन थेट पिस्तूल बाहेर काढले. सौरभ वाघमारे याने अक्षय मोहिते यांच्या दिशेने गोळी झाडण्याचा प्रयत्न केला.मात्र, ती फायर झाली नाही. कारतूस खाली पडल्याने तो प्रयत्न फसला. पण आरोपीने हार मानली नाही. त्याने पुन्हा गोळीबार केला, सुदैवाने ती गोळी कोणीही लागली नाही. अक्षय तत्परतेने पळून जवळच्या सोसायटीत शिरल्याने त्याचा जीव वाचला.
पोलिसांची झटपट कारवाई
या प्रकरणाची माहिती मिळताच वडगाव मावळ पोलिसांनी तातडीने हालचाल केली. पथके तयार करून छापा टाकत तीन आरोपींना अटक करण्यात आली आहे. त्यामध्ये अभिषेक राजाराम ओव्हाळ (28), रणजित बाळासाहेब ओव्हाळ (23) आणि प्रथम सुरेश दिवे (23) यांचा समावेश आहे. मुख्य आरोपींपैकी एक अद्याप फरार असून त्याचा शोध सुरू आहे. वडगाव मावळ पोलिस ठाण्याचे निरीक्षक कुमार कदम यांच्या मार्गदर्शनाखाली पुढील तपास वेगाने सुरू आहे.
परिसरात तणाव, पण परिस्थिती नियंत्रणात
या गोळीबारामुळे परिसरात तणावाचे वातावरण निर्माण झाले होते. मात्र, पोलिसांच्या तत्पर कारवाईमुळे नागरिकांमध्ये भीतीचे वातावरण काही प्रमाणात कमी झाले आहे. अल्पशा कारणावरून घडलेला हा गोळीबार केवळ धक्कादायकच नाही, तर शहरातील कायदा आणि सुव्यवस्था व्यवस्थेवरही प्रश्नचिन्ह निर्माण करणारा ठरला आहे.