तक्रार येताच पोलिसांनी CCTV फुटेज तपासलं; संतोषला ताब्यात घेताच पुण्यातील 6 पोलीस ठाण्यातील त्या 9 गुन्ह्यांचा लागला छडा

सीसीटीव्ही फुटेजने लावला छडा

संतोष शिवराम घारे (वय ४४, रा. ओझर्डे, ता. मावळ) असे अटक करण्यात आलेल्या आरोपीचे नाव आहे. वरिष्ठ पोलीस निरीक्षक सुहास आव्हाड यांनी दिलेल्या माहितीनुसार, संत तुकाराम नगर परिसरातून दुचाकी चोरीला गेल्याची तक्रार प्राप्त झाली होती. पोलिसांनी घटनास्थळावरील सीसीटीव्ही फुटेजची कसून तपासणी केली असता, त्यामध्ये एक संशयित व्यक्ती आढळून आली. तांत्रिक विश्लेषण आणि गोपनीय माहितीच्या आधारे पोलिसांनी सापळा रचून संतोष घारे याला कामशेत येथून ताब्यात घेतले.

advertisement

आरोपीकडे कसून चौकशी केली असता, त्याने पिंपरी-चिंचवड आणि पुणे शहराच्या विविध भागांतून दुचाकी चोरल्याची कबुली दिली. या कारवाईमुळे सहकारनगर, महाळुंगे एमआयडीसी, आळंदी, सांगवी, तळेगाव एमआयडीसी आणि संत तुकारामनगर अशा अनेक पोलीस ठाण्यांतील गुन्हे उघड झाले आहेत.

जप्त केलेल्या ११ दुचाकींपैकी ९ दुचाकींच्या मालकांचा शोध लागला असून, उर्वरित दोन दुचाकींच्या मालकांचा शोध पोलीस घेत आहेत.

पोलिसांचे आवाहन

पोलीस आयुक्त विनयकुमार चौबे आणि सह-आयुक्त शशिकांत महावरकर यांच्या मार्गदर्शनाखाली ही धडक कारवाई करण्यात आली. ज्या नागरिकांच्या दुचाकी चोरीला गेल्या आहेत, त्यांनी अधिक माहितीसाठी संबंधित पोलीस ठाण्याशी संपर्क साधावा, असे आवाहन पोलिसांनी केले आहे. या कारवाईमुळे मावळ आणि पिंपरी परिसरातील वाहन चोरांच्या टोळ्यांचे धाबे दणाणले आहेत.