आयुष कोमकर खून प्रकरणी समर्थनगर पोलिसांनी आंदेकर टोळीचा म्होरक्या बंडू आंदेकर याच्यासह १३ जणांवर खुनाचा गुन्हा दाखल केला. त्यामध्ये माजी नगरसेविका लक्ष्मी आंदेकरसह आणखी एका महिलेचा समावेश आहे. या प्रकरणी यश पाटील आणि अमित पाटोळे दोघांना अटक केली आहे. आरोपी यश आणि अमित यांना रविवारी दुपारी न्यायालयात हजर करण्यात आले. त्यांना कोर्टाने त्यांना १२ सप्टेंबरपर्यंत पोलीस कोठडी सुनावली.
advertisement
या प्रकरणी पोलिसांनी इमारतीतील सीसीटीव्ही फुटेज कल्याणी कोमकर यांना दाखवले असता त्यांनी हल्लेखोर अमन पठाण आणि यश पाटील यांना ओळखले. दोघेही आंदेकर टोळीसाठी काम करतात, असे त्यांनी पोलिसांना सांगितले. दरम्यान, पोलिसांनी याबाबत अधिक खोलात जाऊन तपास केला असता, अमन आणि यश आयुषवर गोळ्या झाडताना काय म्हणाले? याची देखील माहिती समोर आली आहे.
आरोपी अमन आणि यश यांनी आयुषवर गोळीबार करताना ‘इथे फक्त बंडू आंदेकर आणि कृष्णा आंदेकरच’ असं म्हणत दहशत माजवल्याचे निष्पन्न झाले. घटनेनंतर नागरिकांमध्ये भीतीचे वातावरण असल्याने आरोपींवर फौजदारी कायद्यातील दुरुस्तीच्या कलम सातनुसार कलमवाढ करण्यात आली. घटनास्थळी पोलिसांना १२ पुंगळ्या आणि एक अर्धवट पुंगळी सापडली आहे. मृतदेहात एकूण नऊ गोळ्या आढळल्या आहेत. त्यावरून आरोपींनी आयुषला किती क्रूरपणे संपवलं, याचा अंदाज लागू शकतो. या संपूर्ण प्रकरणाचा अधिक तपास केला जात आहे.