बारा ज्योतिर्लिंगांपैकी एक असलेल्या वेरूळच्या श्री घृष्णेश्वर मंदिरात श्रावणात दर्शनासाठी भाविकांची प्रचंड गर्दी असते. हीच बाब लक्षात घेऊन दर्शनाच्या रांगा कमी करण्यासाठी आणि भक्तांना सुलभतेने दर्शन घेता यावे, यासाठी संपूर्ण महिनाभर घृष्णेश्वराचा अभिषेक बंद ठेवण्याचा निर्णय मंदिर देवस्थान ट्रस्टने घेतला आहे. श्रावण महिन्यात मंदिर भाविकांसाठी 24 तास खुले राहणार आहे, असं देखील ट्रस्टकडून सांगण्यात आले आहे.
advertisement
Dahi Handi 2025: राज्य सरकारचा मोठा निर्णय! गोविंदांना मिळणार 10,00,000 रुपयांचं विमा कवच, अट काय?
अभिषेक बंद असला तरी दर्शनासाठी आलेल्या भक्तांना गाभाऱ्यात जाऊन शिवलिंगावर पांढरी फुले, बेलाची पाने (बेलफूल) आणि धोतऱ्याची फुले वाहण्याची परवानगी देण्यात आली आहे. यामुळे भाविकांच्या भावनांचा आदर राखून गर्दीचे नियोजन करणे शक्य होणार आहे. हा निर्णय केवळ श्रावण महिन्यातील गर्दीच्या कालावधीसाठी असून, महिन्यानंतर परिस्थितीनुसार पुढील निर्णय घेतला जाईल, असे ट्रस्टच्या वतीने स्पष्ट करण्यात आले आहे. या निर्णयामुळे श्रावणात घृष्णेश्वराचे दर्शन अधिक सुलभ आणि जलद होईल.
सर्व भाविकांनी या निर्णयाच्या आदर करावा आणि सर्वांनी सहकार्य करावे, असे आवाहन देखील मंदिर ट्रस्टकडून करण्यात आलंय. तसेच अभिषेक बंद ठेवण्याचा निर्णय हा केवळ श्रावण महिन्यापुरता मर्यादित असल्याचंही स्पष्ट करण्यात आलंय.