भारतीय टीमने दक्षिण आफ्रिकेचा पराभव करून दुसऱ्यांदा टी-20 वर्ल्डकप जिंकला आहे; पण फायनल मॅचमध्ये सूर्यकुमार यादवने घेतलेल्या कॅचवर प्रश्न उपस्थित केले जात आहेत. सूर्यकुमारने शेवटच्या ओव्हरच्या पहिल्या बॉलवर बाउंड्रीजवळ मिलरचा सुरेख कॅच घेतला. यादवच्या या कॅचमुळे संपूर्ण सामना फिरला आणि भारतीय संघ विजयी झाला. सूर्यकुमारचा हा कॅच जोरदार चर्चेत आहे. सूर्यकुमारने कॅच घेतला तेव्हा तो बाउंड्रीला स्पर्श करत होता. त्यानुसार ही विकेट नव्हे तर सिक्स रन असायला हवेत, असं पाकिस्तानच्या अनेक माजी क्रिकेटर्सनी म्हटलं आहे.
advertisement
टी-20 वर्ल्डकपच्या फायनल मॅचमध्ये भारताविरुद्ध दक्षिण आफ्रिकेला एका वेळी 30 बॉल्समध्ये 30 रन्सची गरज होती. हेन्रिक क्लासेन आणि डेव्हिड मिलर तुफान बॅटिंग करत होते; पण जसप्रीत बुमराहच्या नेतृत्वाखाली भारतीय बॉलर्सनी दमदार पुनरागमन केलं. त्यानंतर दक्षिण आफ्रिकेच्या बॅट्समनला एक एक रन काढण्यासाठी प्रयत्न करावे लागत होते. दुसरीकडे भारतीय बॉलर्स दक्षिण आफ्रिकेचा एक एक बॅट्समन पॅव्हेलियनमध्ये पाठवत होते. परिणामी भारताने दक्षिण आफ्रिकेचा सात रन्सनी पराभव केला. यात सूर्यकुमार यादवने घेतलेला कॅच जोरदार चर्चेत राहिला; मात्र या कॅचवर अनेक प्रश्न उपस्थित केले गेले.
दरम्यान, दक्षिण आफ्रिकेचा दिग्गज माजी क्रिकेटर शॉन पोलॉकने या कॅचवर भाष्य केलं आहे. शॉन म्हणाला, की 'हा कॅच योग्य होता. बाउंड्री कुशन हलला नाही. खेळात अशा गोष्टी होत असतात. याचं सूर्यकुमारशी काही देणंघेणं नाही. तो कुशनवर उभा नव्हता. त्याने कौशल्याचा पुरेपूर वापर करून कॅच घेतला.' 'टाइम्स ऑफ कराची'ने शॉन पोलॉकचा व्हिडिओ शेअर केला. यात शॉनने सूर्यकुमारच्या कॅचवर आपलं मत व्यक्त केलं आहे.