TRENDING:
मिळालेल्या माहितीनुसार, ठाणे शहरातील अंतर्गत वाहतूक कोंडी कमी करण्याच्या उद्देशाने महा मेट्रोने 223.70 कोटी रुपयांची निविदा जाहीर केली आहे. निविदेअंतर्गत हा प्रकल्प 29 किलोमीटरचा मेट्रो कॉरिडॉर असेल जो ठाणे जंक्शनपासून सुरू होऊन तिकडेच संपणार आहे. हा संपूर्ण मेट्रोचा वर्तुळाकार मार्ग असेल. या मेट्रो प्रकल्पामुळे वागळे इस्टेट, मानपाडा, वाघबीळ, बाळकुम, कोलशेत, साकेत, डोंगरी पाडा, नौपाडा, आणि हिरानंदानी इस्टेट यांसारख्या ठाण्यातील महत्त्वाच्या अंतर्गत भागांना थेट मेट्रो जोड मिळणार आहे. परिणामी, या परिसरातील नागरिकांचा दैनंदिन प्रवास अधिक वेगवान होऊन वेळेची मोठी बचत होणार आहे.
advertisement
डॉ. काशिनाथ घाणेकर नाट्यगृह, मानपाडा, डोंगरीपाडा, विजय नगरी, वाघबीळ आणि वॉटरफ्रंट या ठिकाणी उन्नत मेट्रो स्थानकांचे बांधकाम करण्यात येणार आहे. संपूर्ण मेट्रोचा मार्ग पाहता लवकरच ठाणेकरांची वाहतूक कोंडीतून सुटका होणार आहे. ठाणे अंतर्गत वर्तुळाकार मेट्रो मार्गाची एकूण लांबी 29 किलोमीटर असून, या मार्गावर एकूण 22 मेट्रो स्थानके असतील. प्रकल्पाच्या पहिल्या टप्प्यात 6 किलोमीटर लांबीच्या मार्गावर 6 स्थानकांचे काम पूर्ण केले जाणार आहे. संपूर्ण मार्गिकेंपैकी सुमारे 26 किलोमीटरचा मार्ग उन्नत (एलिव्हेटेड) स्वरुपाचा असेल. ठाणे रेल्वे स्थानकाजवळील दोन मेट्रो स्थानके भूमिगत (अंडरग्राउंड) असणार असून, त्यामुळे रेल्वे आणि मेट्रोमधील बदल (इंटरचेंज) अधिक सोपा होणार आहे.
ठाणे शहरातच उच्च क्षमतेचा आणि जलद वाहतूक पर्याय उपलब्ध करून देण्याचा मानस आहे. ठाण्यामधील प्रमुख रस्त्यांवरील वाहतूक कोंडी कमी करणे आणि वर्तुळाकार मेट्रोचा मुंबई मेट्रो 4 आणि मेट्रो 5 मार्गिकांशी थेट संपर्क जोडण्याचा मानस आहे. त्यामुळे ठाणे ते मुंबई आणि ठाणे ते कल्याण असा मेट्रो प्रवास शक्य होणार आहे. या मेट्रोमुळे खरंतर उपनगरांमधील प्रवाशांना मोठा दिलासा मिळणार आहे. 2045 पर्यंत या मेट्रो मार्गिकेवरून दररोज सुमारे 8 लाख 70 हजार प्रवासी प्रवास करतील, असा अंदाज वर्तवण्यात आला आहे. राज्य आणि केंद्र सरकारच्या संयुक्त भागीदारीतून उभारण्यात येणारा हा प्रकल्प सुमारे 12 हजार 200 कोटी रुपये खर्चाचा असून, ठाण्याच्या सार्वजनिक वाहतुकीला नवी दिशा देणारा ठरणार आहे.