इराणचा नवा सुप्रीम लीडरही कोमात? एक पायही गमावला, मोजतबा खामेनींबद्दल खळबळजनक दावा

नेमका दावा काय?

'द सन'ने सूत्रांच्या हवाल्याने दिलेल्या वृत्तानुसार, मोजतबा खामेनी यांना तेहरानमधील सिना युनिव्हर्सिटी हॉस्पिटलमध्ये कडक सुरक्षेत आयसीयूमध्ये ठेवण्यात आलं आहे. इराणचे आरोग्य मंत्री आणि नामवंत सर्जन मोहम्मद रजा जफरगंदी स्वतः त्यांच्या प्रकृतीवर लक्ष ठेवून आहेत. २८ फेब्रुवारी रोजी झालेल्या ज्या हल्ल्यात आयतुल्लाह अली खामेनी यांचा मृत्यू झाला, त्याच हल्ल्यात मोजतबा हे देखील गंभीर जखमी झाले असावेत, असा संशय व्यक्त केला जात आहे.

advertisement

नेमका संशय कशामुळे बळावत आहे?

खरं तर आयतुल्ला अली खामेनी यांच्या मृत्यूनंतर मोजतबा खामेनी यांची इराणच्या सुप्रीम लीडर पदी नियुक्ती करण्यात आली आहे. ते सुप्रीम लीडर झाले असले तरी २८ फेब्रुवारीला युद्ध सुरू झाल्यापासून मोजतबा एकदाही लोकांसमोर आलेले नाहीत. ८ मार्च रोजी त्यांची सर्वोच्च नेते म्हणून निवड झाल्यावर ते देशाला संबोधित करतील, असं सांगण्यात आलं होतं, मात्र तसं झालं नाही.

सुप्रीम लीडरपदी नियुक्ती झाल्यानंतर ५ दिवसांनंतर त्यांचा पहिला संदेश समोर आला होता. पण तो टीव्हीवर एका अँकरने वाचून दाखवला. मोजतबा स्वतः कॅमेऱ्यासमोर आले नाहीत. एवढंच नव्हे तर इराणच्या सरकारी टीव्हीवर अँकर्सनी त्यांचा उल्लेख 'रमजान युद्धाचा जांबाज' म्हणजेच 'घायल योद्धा' असा केला आहे, ज्यामुळे ते दुखापतग्रस्त झाल्याच्या वृत्ताला दुजोरा मिळत आहे.

राष्ट्रपतींशी गुप्त भेट?

'द सन'ने दिलेल्या वृत्तानुसार, इराणचे राष्ट्रपती मसूद पेजेश्कियान यांनी दोन दिवसांपूर्वी गुप्तपणे हॉस्पिटलमध्ये जाऊन मोजतबा यांची भेट घेतली. दरम्यान, मोजतबा यांच्या नावाने प्रसिद्ध झालेल्या पहिल्या संदेशात त्यांनी 'होर्मुज स्ट्रेट'ची नाकेबंदी सुरूच राहील आणि खाडी देशांवरील हल्ले थांबणार नाहीत, असा इशारा दिला आहे. इराण सरकारने अद्याप या दाव्यांची अधिकृत पुष्टी केलेली नाही, मात्र मोजतबा खामेनी यांच्या प्रकृतीबाबतच्या गूढामुळे जागतिक राजकारणात मोठी अस्वस्थता निर्माण झाली आहे.