तुमचा अपमान आणि पश्चात्ताप झाल्याशिवाय हे युद्ध थांबणार नाही, इराणचा थेट डोनाल्ड ट्रम्प यांना इशारा

इराणच्या सरकारी माध्यम Press TV च्या माहितीनुसार खातम अल-अनबिया सेंट्रल मुख्यालयाच्या प्रवक्त्याने अमेरिकेच्या या दाव्यांना स्पष्टपणे फेटाळून लावले. त्यांनी सांगितले की इराणच्या लष्करी क्षमतेबाबत अमेरिकेची गुप्तचर माहिती अपूर्ण आहे.

अमेरिकेच्या राष्ट्राध्यक्षांना प्रत्युत्तर देताना प्रवक्त्याने म्हटले की वॉशिंग्टनला इस्लामिक रिपब्लिकच्या विस्तृत रणनीतिक क्षमतांची अजिबात कल्पना नाही. संघर्षादरम्यान इराणच्या क्षेपणास्त्र आणि ड्रोन क्षमतेवर मोठा परिणाम झाला असल्याच्या ट्रम्प यांच्या दाव्यालाही त्यांनी नाकारले.

advertisement

आमच्या लष्करी शक्ती आणि उपकरणांबाबत तुमची माहिती अपुरी आहे. आमच्या व्यापक रणनीतिक क्षमतांबाबत तुम्हाला काहीही माहिती नाही. तुम्ही आमच्या रणनीतिक क्षेपणास्त्र निर्मिती केंद्रांचा, लांब पल्ल्याच्या हल्ल्यांच्या आणि अचूक ड्रोन प्रणालींचा, आधुनिक हवाई संरक्षण यंत्रणेचा, इलेक्ट्रॉनिक युद्ध तंत्रज्ञानाचा किंवा विशेष उपकरणांचा नाश केला आहे, असे समजू नका, असे त्यांनी स्पष्ट केले.

खातम अल-अनबिया सेंट्रल मुख्यालय हे इराणचे सर्वोच्च ऑपरेशनल कमांड युनिट असून ते इराणी लष्कर आणि Islamic Revolutionary Guard Corps (IRGC) यांच्यात समन्वय साधते.

अमेरिकेवर आक्रमणाची सुरुवात केल्याचा आरोप करत प्रवक्त्याने पुढे इशारा दिला. तुम्ही आमच्या सन्माननीय आणि प्रिय मुस्लिम राष्ट्रावर केलेल्या आक्रमणाची किंमत तुम्हाला चुकवावीच लागेल. हे युद्ध तेव्हाच थांबेल जेव्हा तुम्हाला कायमस्वरूपी अपमान, पश्चात्ताप आणि शरणागतीला सामोरे जावे लागेल. आम्ही आधीच दिलेल्या जबरदस्त प्रत्युत्तरानंतर पुढेही अधिक कठोर आणि विध्वंसक हल्ल्यांची अपेक्षा ठेवा, असे प्रवक्त्याने म्हटले.

दरम्यान अमेरिकेवर हल्ल्यांची सुरुवात झाल्यानंतर सकाळी ट्रम्प यांनी राष्ट्राला संबोधित करताना अमेरिकन सैन्याचे कौतुक केले. त्यांनी सांगितले की इराणवर निर्णायक प्रहार करण्यात आला असून मोहिमेचे मुख्य उद्दिष्ट पूर्ण होण्याच्या जवळ आहे. इराणची नौदल आणि हवाई क्षमता मोठ्या प्रमाणात उद्ध्वस्त झाली आहे आणि त्यांच्या लष्करी पायाभूत सुविधांनाही गंभीर फटका बसला आहे.

इराणचे नौदल संपले आहे. त्यांची वायुसेना उद्ध्वस्त झाली आहे आणि त्यांचे अनेक नेते, जे दहशतवादी होते, आता मृत आहेत, असे ट्रम्प यांनी ठामपणे सांगितले.