मंगळावरच्या खडकाळ जमिनीवरून चालताना नासाच्या पर्सीव्हरन्स रोव्हरला एक विचित्र दृश्य दिसले. मंगळावर या रोव्हरला अनेक चमकदार पांढरे खडे सापडले. हे खडे मंगळावरच्या जेझिरो क्रेटरच्या काठावर असलेल्या लहान खडकांमध्ये आहेत. रोव्हरने या खड्यांचे फोटो काढून नासाला पाठवले आहेत. हे फोटो पाहून संशोधकांचा उत्साह वाढला आहे. पर्सीव्हरन्स रोव्हर सध्या या क्रेटरच्या तीव्र उतारावर चढाई करत आहे.
advertisement
मिस्ट पार्क नावाच्या ढिगाऱ्याच्या तळाशी पर्सीव्हरन्स रोव्हरला हे खडे सापडले. आव्हानात्मक चढाईनंतर दोन महिन्यांनी त्याने हा शोध लावला. नासाच्या संशोधकांच्या पथकाने या खडकांचा आढावा घेण्यासाठी रोव्हरची रिमोट सेन्सिंग यंत्रणा सक्रिय केली आहे.
पृथ्वीवर अशा प्रकारचे पांढरे खडे सापडणं हे सामान्य गोष्ट आहे. असे खडकदेखील पृथ्वीवर अनेक ठिकाणी पाहायला मिळतात; पण मंगळावर पांढरे खडे सापडणं आश्चर्यकारक मानलं जातं. मंगळाच्या बेसाल्टिक थरामुळे हे आश्चर्य पाहायला मिळत आहे. याचा रंग सामान्यतः गडद असतो. या खडकांमधून मंगळाच्या भूवैज्ञानिक इतिहासाची माहिती समोर येऊ शकते.
सध्या पर्सीव्हरन्सवरच्या मास्टकॅम-झेड या खडकांचं मल्टी स्पेक्ट्र्ल इमेजिंग करत आहे. सुपरकॅम लेझरच्या माध्यमातून या दगडांच्या आतली संरचना जाणून घेतली जात आहे. हे दगड आकाराने खूप लहान आणि विखुरलेले आहेत. त्यामुळे रोव्हरवर लावलेल्या रोबॉटिक आर्मवरची यंत्रणा त्याच्या जवळ जाऊन त्याचे बारकाईने निरीक्षण करू शकत नसल्याची स्थिती आहे. या नवीन संशोधनामुळे मंगळ ग्रहावरच्या अनेक रहस्यांची उकल होऊ शकते, असा विश्वास संशोधकांना आहे.