एक गाडी बाकी अनाडी! कोल्हापूरकराचं बुलेट प्रेम, कंपनीची ऑफर देखील नाकारली!

कोल्हापूर : कोल्हापूरकरांचं बाईक प्रेम सर्वांनाच माहितीये. अनेक विंटेज बाईक आणि कारचं कलेक्शनच कोल्हापूरकरांकडे आहे. त्यातच कोल्हापूरकरच नव्हे तर भारतीयांना भुरळ घालणारी गाडी म्हणजे रॉयल एनफिल्ड. खरं तर बुलेटची क्रेझ अगदी कॉलेज कुमारांपासून ते साठीतल्या आजोबांपर्यंत सगळ्यांमध्येच पाहायला मिळते. बुलेट ही अनेकांसाठी फक्त एक वाहन नाही तर प्रतिष्ठा आणि स्टेट्स सिम्बॉल आहे. कोल्हापुरातील बेंडके कुटुंबाकडे अशीच एक 67 वर्षे जुनी बुलेट आहे. पिढ्यानपिढ्या जपलेल्या याच विंटेज बुलेटची कहाणी आपण लोकल18 च्या माध्यमातून जाणून घेणार आहोत.

कोल्हापुरातील बेंडके कुटुंबीयांकडे 1950 सालची एक बुलेट असून ती इंग्लंडमधून इंपोर्ट केली होती. या कुटुंबातील आजोबांनी 1958 मध्ये 3600 रुपयांना बुलेट खरेदी केली होती. त्यानंतर आजतागायत ही गाडी अगदी छान पद्धतीनं मेन्टेन करून ठेवली आहे. आज बेंडके यांची तिसरी आणि चौथी पिढी ही गाडी चालवतेय. विशेष म्हणजे 67 वर्षानंतरही गाडी सुस्थितीत असून गाडीचे सर्व पार्ट ओरिजनल आहेत, असं गाडीचे मालक समीर बेंडके सांगतात.

दरम्यान, गेल्या 67 वर्षांपासून बेंडके कुटुंब रॉयल एनफिल्ड वापरत असून ती अगदी जशीच्या तशी आहे. कोल्हापूरकरांनी जपलेल्या हौसेला मोल नसतं. बेंडके सांगतात की, आजही आमच्याकडे वेगवेगळ्या प्रकारच्या ऑफर्स येत असतात. मात्र, आम्ही या सर्वच प्रकारच्या ऑफर नाकारल्या आहेत. आता बेंडके यांची चौथी पिढी देखील ही गाडी वापरतेय.