१ कोटीच्या नोकरीला लाथ, बिझनेस सुरू केला, आता कोट्यवधींची संपत्ती, पोरीचा जगात डंका

नवी दिल्ली : आयुष्यात मोठं यश मिळवायचं असेल तर त्यासाठी जोखीम पत्करावी लागते,असं म्हणतात. जे लोक रिस्क घ्यायला घाबरत नाहीत आणि खूप मेहनत करतात त्यांना यशस्वी होण्यापासून कोणीही रोखू शकत नाही. याचेच एक उदाहरण म्हणजे उत्तर प्रदेश येथील मुरादाबादमध्ये जन्मलेली आरुषी अग्रवाल... टॅलेंट डिक्रिप्ट कंपनीची फाउंडर आरुषीला एम.टेक केल्यावर चांगल्या पगाराच्या नोकरीच्या दोन ऑफर मिळाल्या. तिने त्यातली कोणतीही ऑफर घेतली असती तरी तिला वार्षिक एक कोटी रुपये कमावता आले असते. मात्र आरुषीला काहीतरी वेगळं करायचं होतं. तिने नोकरी न करता स्वतःचा बिझनेस सुरू करायचं ठरवलं. 2020 मध्ये तिने एक लाख रुपयांची गुंतवणूक करून 'टॅलेंट डिक्रिप्ट' नावाची कंपनी सुरू केली. आता ती वर्षाकाठी 50 कोटी रुपये कमवत आहे. तिच्या आंत्रप्रेन्‍युअरशिपसाठी नीती आयोगाने आरुषी अग्रवालला सन्मानित केलंय.