एक Video व्हायरल आणि पुरतं बदललं आयुष्य, 21 वर्षीय तरुणी करतेय बक्कळ कमाई!

मुंबई: कला ही केवळ आवड न राहता संधीचं दारही ठरू शकते, हे पायल खिलारीने सिद्ध केलं. पायलने कधी कल्पनाही केली नव्हती की एक साधा व्हिडिओ तिच्या आयुष्याला वेगळी दिशा देईल. सोशल मीडियावर शेअर केलेली कलाकृती पाहता पाहता लाखोंच्या मनात घर करून गेली. आज तिच्या कलेला मोठी मागणी मिळू लागलीय आणि ती आपला व्यवसाय यशस्वीपणे वाढवत आहे.

बोरिवलीतील 21 वर्षीय पायल खिलारीच्या बाबतीतही असंच घडलं. हॉटेल मॅनेजमेंटचे शिक्षण घेतलेल्या पायलला लहानपणापासूनच चित्रकलेची आवड होती. ती केवळ रंगांमध्ये रमणारी नव्हती, तर प्रत्येक सण-उत्सवाला आपल्या कलेच्या माध्यमातून घर सजवणे, लग्नात रुखवत तयार करणे किंवा पोर्ट्रेट तयार करणे हे तिच्या दैनंदिन आयुष्याचा भाग होतं. तिच्या कलाकृतींमध्ये बारकावे, कल्पकता आणि पारंपरिकतेचा सुंदर मिलाफ असायचा. मात्र, एका साध्या व्हिडिओने तिच्या या छंदाला संधीचे पंख दिले.

लग्नातील रुखवत, बाळांचे नामकरण, गृहप्रवेश किंवा खास भेटवस्तू यासाठी लोक तिच्याशी संपर्क साधू लागले. काही जणांनी पारंपरिक डिझाइन्स मागितल्या, तर काहींनी खास ऑर्डरनुसार कलाकृती बनवण्याची विनंती केली. पायलने आपल्या कलेला केवळ छंद न ठेवता व्यवसायात बदलण्याचा निर्णय घेतला आणि हळूहळू तिच्या मेहनतीचं चीज होऊ लागलं.