पोरीनं पांग फेडलं! हलाखीच्या परिस्थितीवर मात करत हॉकी खेळाडू झाली पोलीस, Video

योगिनीच्या घरची परिस्थिती बेताची आहे. वडिलांचा चहा टपरीचा व्यवसाय कोरोनाकाळात बंद पडला. सध्या एमआयडीसीमध्ये सुरक्षारक्षक म्हणून ते कार्यरत आहेत. आईने योगिनीच्या शिक्षण आणि हॉकी खेळासासाठी कसेबसे पैसे जमवले. व्याजाने पैसे काढून खेळासाठी दिले. आईमुळे आणि घरच्यांच्या पाठिंब्यामुळे माझं हे यश आहे, असं योगिनी सांगते.

योगिनीच्या यशाविषयी बोलताना आईवडिलांच्या डोळ्यात आनंदाश्रू दिसतात. योगिनी पाचव्या वर्गात शिकत असताना तिने खेळण्यास सुरुवात केली. तिचं शिक्षण बी. कॉम. बाबाजी दाते महाविद्यालय यवतमाळ येथून झालं. 2019 मध्ये होमगार्डचं प्रशिक्षण पूर्ण केलं. तर 2017 मध्ये विद्यापीठातील हॉकी स्पर्धेत सहभाग घेतला. 2023 मध्ये पोलीस शिपाई म्हणून पोलीस मुख्यालय येथे नोकरीला रुजू झाली. तिला तिच्या यशामध्ये तिचे प्रशिक्षक आणि मार्गदर्शक मनीषा आकरे याची खूप मोठी साथ असल्याचं योगिनी सांगते.