वय वर्षे 22, महिन्याची कमाई फक्त 8 लाख, IT मध्ये नोकरी नाही तर पठ्ठ्याचा 200 म्हशींचा गोठा!

नाशिक: सध्याच्या काळात शिक्षण घेऊन नोकरीच्या शोधात अनेक तरुण असतात. पण नाशिकमधील एक 22 वर्षीय तरुण याला अपवाद ठरलाय. शुभम उत्तम अरिंगळे याच्या वडिलांचा पूर्वापार दुग्ध व्यवसाय आहे. कोरोनाच्या काळात लॉकडाऊनमध्ये सर्व व्यवहार ठप्प झाले. तेव्हा शुभम वडिलांना साथ देत दुग्ध व्यवसायात उतरला. आता त्याच्याकडे 200 जाफराबादी म्हशींचा गोठा असून यातून महिन्याला तब्बल 7 ते 8 लाख रुपयांची कमाई होतेय. एखाद्या आयटी मध्ये काम करणाऱ्या इंजिनिअरपेक्षा शुभमची कमाई जास्त असून युवा उद्योजक म्हणून त्याचा पंचक्रोशित लौकिक आहे.

शुभमचे वडील उत्तम अरिंगळे हे पूर्वापार दुग्ध व्यवसाय करत आहेत. कोरोना काळात लॉकडाऊनमुळे सगळं ठप्प असताना शुभमचे कॉलेज देखील बंद होते. तेव्हा त्याने वडिलांना दुग्ध व्यवसायात मदत सुरू केली. पुढे याच व्यवसायात मन रमल्याने शिक्षणाला कायमचा पूर्णविराम दिला आणि म्हशींची संख्या वाढवण्याचा निर्णय घेतला. आता त्यांच्या गोठ्यात 200 जाफराबादी म्हशी आहेत. तसेच सध्या या व्यवसायातून 15 जणांना रोजगार देखील दिला आहे.