आर आर आबांचा आदर्श! शिक्षणाला वय नसतं, आर आर तात्यांनी निवृत्तीनंतर घेतली कायद्याची पदवी

कोल्हापूर : वय फक्त एक नंबर असतो, असं आपण अनेकदा बोलतो. त्यातून शिक्षणालाही वयाचे बंधन नसते. आपण आपल्या आवडत्या विषयात कधीही शिक्षण घेऊ शकतो. अशावेळी गरज असते ती फक्त जिद्दीची... हेच कोल्हापूरकरांच्या लाडक्या आर आर तात्यांनी सिध्द करून दाखवलंय.. तर झालं असं.. की नुकतंच आर आर तात्यांनी वयाच्या 63 व्या वर्षी निवृत्तीनंतर एलएलबी डिग्री मिळवली.. विशेष म्हणजे ते गेल्या 35 वर्षांपासून पोलीस दलात कार्यरत होते.. त्यांच्या कार्यकाळात दोन राष्ट्रपती पदके.. पोलीस महासंचालक पदक आणि 771 विविध पुरस्कारांनी सन्मानित देखील करण्यात आलंय.

भाऊ आर आर आबा मंत्री, वहिनी आमदार आणि लाभलेला घरचा मोठा राजकीय वारसा.. तरीही कोणताही बडेजाव न करता जसं पोलीस दलात आपलं प्रामाणिक पणे सेवा देण्याचं कर्तव्य पार पाडलं अगदी तसंच त्यांनी निवृत्तीनंतर वयाच्या 63 व्या वर्षी एलएलबी शिक्षण जिद्दीनं पूर्ण केलं. कोल्हापूरचे आर आर तात्या म्हणजे प्रचंड जिद्दी संयमी आणि नियमांचं काटेकोर पालन करणारं व्यक्तिमत्व.. नेहमी काहीतरी शिकत राहायचं असा जणू त्यांनी निश्चयच केलाय.. आत्तापर्यंतचा त्यांचा पोलीस दलातील कार्यकाळाचा प्रवास कोल्हापूरकरांना माहीतच आहे.. पण निवृत्तीनंतरचा त्यांचा शैक्षणिक प्रवास आपण जाणून घेणार आहोत. यासाठी लोकल18 ने खास आर आर तात्या म्हणजेच राजाराम रामराव पाटील यांच्याशी विशेष बातचीत केलीय.