'मी पिस्तुल मागवतोय, आता 3 खून होतील', तरुणाची डॉक्टरांना धमकी, धक्कादायक घटना

ग्वाल्हेर : गेल्या काही दिवसात गुन्हेगारीच्या घटनांमध्ये मोठ्या प्रमाणात वाढ होत असल्याचे दिसून येत आहे. विविध व्हिडिओही सोशल मीडियावर व्हायरल होत असतात. त्यातच आता आणखी एक व्हिडिओ व्हायरल झाला आहे. यामध्ये एका तरुणाने दोन डॉक्टरसह मुख्य वैद्यकीय आरोग्य अधिकाऱ्याला जीवे मारण्याची धमकी दिली.

दरम्यान, या घटनेनंतर डॉक्टर संघटनेने पोलीस महानिरीक्षक कार्यालय गाठून घटनेची तक्रार दिली. तसेच अशा लोकांवर लवकरात लवकर कडक कारवाई करावी, अशी मागणी केली.

माथेफिरू तरुणाने तीन डॉक्टरांना जीवे मारण्याची धमकी दिल्याचा 50 सेकंदाचा हा व्हिडिओ सोशल मीडियावर व्हायरल झाला आहे. यामध्ये मी आता माझी पिस्तूल आणि रिवॉल्व्हर मागवत आहे आणि तीन खून करणार आहे. यामध्ये पहिला खून डॉ. प्रशांत नायक, दुसरा खून डॉ. बिंदू सिंघल आणि तिसरा खून मुख्य वैद्यकीय आरोग्य अधिकाऱ्याचा असेल, असे सांगताना तो दिसत आहे.

धमकी देणाऱ्या या तरुणाच्या आईला काही दिवसांपूर्वी हजीरा रुग्णालयात दाखल करण्यात आले होते. याठिकाणी त्याच्या आईवर योग्यप्रकारे उपचार सुरू होते. त्यानंतर त्यांना सुट्टीही देण्यात आली. यानंतर त्याने मुख्य वैद्यकीय व आरोग्य अधिकाऱ्यांना फोनवर जीवे मारण्याची धमकी दिली. दरम्यान, डॉक्टर असोसिएशनच्या तक्रारीवरुन माथेफिरु तरुणाला पोलिसांनी ताब्यात घेतले असून पोलीस पुढील तपास करत आहेत. त्याच्यावर योग्य ती कार्यवाही केली जाईल, असे आश्वासनही पोलिसांनी दिले.