आईवडील की कसाई? जन्मलेल्या बाळासोबत असं कोण वागतं? छ. संभाजीनगरात भयंकर प्रकार

नियंत्रण कक्षाकडून मिळालेल्या माहितीनंतर सिडको एमआयडीसी पोलिसांनी तत्काळ घटनास्थळी धाव घेतली. सिडको बसस्थानक परिसरात एका मोकळ्या जागेत एक अर्भक बेशुद्ध अवस्थेत पडलेले असल्याचे पोलिसांच्या निदर्शनास आले. थंडी, अंधार आणि माणुसकीचा अभाव सहन करत ते निष्पाप बाळ एकटेच पडले होते.

‎प्राथमिक तपासात, कोणीतरी अज्ञात आई-वडिलांनी जन्म दिलेल्या अर्भकाला उघड्या जागेवर टाकून, कोणतीही काळजी न घेता तेथून निघून गेल्याचे स्पष्ट झाले आहे. जन्म देऊनही त्या बाळाच्या श्वासाची, त्याच्या भवितव्याची कोणतीही पर्वा न करता त्याला मृत्यूच्या दाढेत ढकलण्यात आल्याचा संशय पोलिसांनी व्यक्त केला आहे.

‎या प्रकरणी सहायक पोलीस उपनिरीक्षक संजयकुमार साबळे यांनी तक्रार दिली असून, अज्ञात आई-वडिलांविरोधात सिडको एमआयडीसी पोलीस ठाण्यात गुन्हा दाखल करण्यात आला आहे. या धक्कादायक घटनेचा अधिक तपास पोलीस निरीक्षक भरत पाचोळे यांच्या मार्गदर्शनाखाली सुरू आहे. जन्म घेण्याआधीच संपलेली ही कहाणी समाजाच्या संवेदनशीलतेवर गंभीर प्रश्नचिन्ह निर्माण करणारी आहे. त्या निष्पाप जीवाला जगण्याची संधीही न देणारे ते क्रूर आई-वडील नेमके कोण, याचा शोध घेण्यासाठी पोलीस यंत्रणा कसून तपास करत आहे.