jalna Crime: सासू साखर झोपेत असताना सूनेनं घरात पाडला रक्ताचा सडा, प्रतिक्षाने असं का केलं?

सून प्रतिक्षा शिनगारे हिने पहाटे आपली सासू सविता हिचे डोके भिंतीवर आपटून खून केला. त्यानंतर मृतदेह गोणीत कोंबून घेऊन त्याची विल्हेवाट लावण्याचा प्रयत्न होता. मात्र, तिला हे कृत्य पूर्ण करता आले नाही. शेवटी एका व्यक्तीसह ती बुलेटवरून फरार झाली. घरमालकाच्या ही बाब लक्षात येताच त्यांनी पोलिसांना माहिती दिली. त्यानंतर घटनास्थळी धाव घेत पोलिसांनी पचंनामा करून मृतदेह शवविच्छेदनासाठी रुग्णालयात पाठवला.

शिनगारे यांच्या घरी सीसीटीव्ही कॅमेरे आहेत. पोलिसांनी फुटेज ताब्यात घेतलं असून अधिक तपास सुरू आहे. प्रतिक्षा ही पहाटे 5:28 वाजता घरातून बाहेर पडताना सीसीटीव्ही कॅमेऱ्यात कैद झाली आहे. ती एका साथीदाराच्या मदतीने दुचाकीवरून पळून गेली असून तिचा शोध घेण्यासाठी पोलिसांनी दोन पथके तैनात केली आहेत. ही घटना समोर आल्यानंतर तपास सुरू केला असून प्रतिक्षा आणि तिच्या साथीदाराचा ठावठिकाणा शोधण्याचे प्रयत्न सुरू आहेत, असे अप्पर पोलिस अधीक्षक आयुष नोपाणी यांनी सांगितले.

या प्रकरणाने परिसरातील रहिवाशांमध्ये भीतीचे वातावरण आहे. सासू-सुनेतील वादाचे कारण काय होते, याबाबत अद्याप स्पष्ट माहिती समोर आलेली नाही. पोलिस या प्रकरणाचा सखोल तपास करत असून, सुनेला परभणी येथून ताब्यात घेण्यात पोलिसांना यश मिळाले आहे.