नगरमध्ये गोळीबाराचा थरार, अल्पवयीन मुलाने 2 भावांवर झाडल्या गोळ्या

संबंधित घटना श्रीरामपूर शहरातील भैरवनाथनगर परिसरात घडली आहे. इथं एका अल्पवयीन मुलाने दोन भावांवर दोन गोळ्या झाडल्या. यातील एक गोळी एका भावाच्या पायाला लागली, तर दुसरी गोळी हुकवण्यास दुसऱ्या भावाला यश आलं. मिळालेल्या माहितीनुसार, पीडित तरुणाचं कुटुंब भैरवनाथनगर परिसरात वास्तव्याला आहे. याच भागात पीडित तरुणाची आत्याही राहते. आत्याने या भागात स्वत:च्या घराचं बांधकाम सुरू केलं आहे.

घटनेच्या दिवशी हे दोन्ही भाऊ आपल्या आत्याच्या घराची देखरेख करण्यासाठी साईटवर आले होते. गुरुवारी दुपारी अल्पवयीन आरोपी त्याठिकाणी आला, तिथे त्याने एका भावाला जीवे मारण्याची धमकी दिली आणि त्याने एका भावाच्या दिशेनं गोळीबार केला. पहिली गोळी एका भावाच्या पायाला लागली. यावेळी दुसरा भाऊ घटनास्थळावरून पळून जाऊ लागला. तेव्हा अल्पवयीन मुलाने पळून जाणाऱ्या भावाच्या दिशेनं दुसरी गोळी झाडली.

सुदैवाने ही गोळी दुसऱ्या भावाला लागली नाही. गोळीबाराच्या या घटनेनंतर गोळीबारातून बचावलेल्या भावाने श्रीरामपूर शहर पोलीस ठाण्यात धाव घेत फिर्याद दाखल केली आहे. या प्रकरणी पोलिसांनी हत्येच्या प्रयत्नांसह विविध कलमांतर्गत गुन्हा दाखल केला आहे. पोलीस फरार आरोपीचा शोध घेत आहेत. हा गोळीबार नेमका कोणत्या कारणातून करण्यात आला, याचा तपास पोलीस करत आहेत. दिवसाढवळ्या अशाप्रकारे गोळीबार घडल्याने परिसरात खळबळ उडाली आहे.