धक्कादायक! हाॅटेलमध्ये घेऊन जायची विद्यार्थ्याला; नंतर ही शिक्षिका बंद करायची खोलीचं दार, पुढे...

ही धक्कादाय बातमी हरियाणामधील रेवाडीतून समोर आली आहे. या घटनेची तक्रार दाखल होताच, आरोपी शिक्षिकेने अटकपूर्व जामिनासाठी कोर्टात अर्ज केला. पण कोर्टाने पुरावे पाहून तिचा अर्ज फेटाळून लावला. त्यानंतर ती शिक्षिका फरार झाली आहे. आता पोलीस तिचा शोध घेण्यासाठी ठिकठिकाणी धाडी टाकत आहेत. मिळालेल्या माहितीनुसार, पीडित विद्यार्थी मूळचा रेवाडी जिल्ह्यातील धारुहेरा येथील आहे. तो गुरुग्राममधील एका नामांकित शाळेत शिकत होता. तिथे त्याची वर्गशिक्षिका त्याला अभ्यासाचं काम असल्याचं सांगून घरी बोलवायला लागली. हळूहळू शिक्षिकेने अल्पवयीन विद्यार्थ्यासोबत शारीरिक संबंध प्रस्थापित केले. ही शिक्षिका अंदाजे 35 वर्षांची असून ती विवाहित आहे. घरी पकडले जाण्याची भीती वाटू लागल्यावर तिने विद्यार्थ्याला हॉटेलमध्ये नेण्यास सुरुवात केली.

जून 2024 मध्ये, या शिक्षिकेने विद्यार्थ्याला धारुहेरातील सेक्टर-6 मधील एका हॉटेलमध्ये नेलं. ऑगस्ट आणि सप्टेंबर महिन्यातही शिक्षिकेने विद्यार्थ्याला हॉटेलमध्ये नेऊन त्याच्यावर अत्याचार केले. त्यानंतर या महिला शिक्षिकेने धारुहेरा येथील एका सोसायटीमध्ये नवीन घर घेतलं. तिथेही ती चांगल्या मार्कांची लालूच दाखवून विद्यार्थ्याला बोलवायला लागली आणि नवीन घरातही तिने त्याच्यावर अनेक वेळा लैंगिक अत्याचार केले.

जेव्हा पीडित विद्यार्थ्याच्या वडिलांना हे सर्व कळलं, तेव्हा त्यांच्या पायाखालची जमीनच सरकली. त्यांनी मार्च 2025 मध्ये पोलिसांत तक्रार दाखल केली आणि अनेक व्हिडिओ पोलिसांना पुरावा म्हणून दिले. हे व्हिडिओ विद्यार्थ्यानेच बनवले होते. सुरुवातीच्या तपासणीत असं समोर आलं आहे की, ही महिला शिक्षिका मूळची चरखी दादरी येथील आहे. ती विद्यार्थ्यांना हॉटेलमध्ये नेताना त्यांना आपले नातेवाईक असल्याचं सांगत असे. आणखी एक धक्कादायक गोष्ट समोर आली आहे ती म्हणजे, शिक्षिका हॉटेलचे पैसे रोखीत (कॅशमध्ये) देत असे. पोलिसांनी संबंधित हॉटेल्सचे रेकॉर्ड तपासले, तेव्हा त्या दोघांची तिथे उपस्थिती असल्याची खात्री झाली.