संगीतकाराला राग येताच गीतकारानं काड्यापेटीवर लिहिला गाण्याचा मुखडा; देवानंद-वहीदा रहमानच्या अजरामर गाण्याची गोष्ट

ज्या गाण्यामागील गोष्टी सांगितली जात आहे ते गाणं 'काला बाजार' चित्रपटातील आहे. 9 सप्टेंबर 1960 रोजी प्रदर्शित झालेला हा चित्रपट विजय आनंद यांनी दिग्दर्शित केला होता. देव आनंद, वहिदा रहमान आणि नंदा यांनी यात महत्त्वपूर्ण भूमिका साकारल्या होत्या. या चित्रपटातील ‘खोया खोया चांद, खुला आसमां…’ या गाण्याच्या निर्मितीची ही गोष्ट आहे. चित्रपटाच्या कथेनुसार विजय आनंद यांनी सचिनदा यांच्याकडे गाण्याची मागणी केली होती. सचिनदांनी एक छोटीशी धूनही तयार केली होती. गीतकार शैलेंद्र यांनी त्या धूनवर आधारित गाणं लिहावं, अशी त्यांची इच्छा होती. पण, शैलेंद्र इतर गाणी तयार करण्यात इतके व्यस्त होते की त्यांना सचिनदांसाठी गाणं लिहिता आलं नाही. जवळपास एक महिना गाणं लिहिलं गेलं नाही. मुळात रागीट स्वभावाचे असलेले सचिनदा खूप संतापले. त्यांनी आपला मुलगा आर. डी. बर्मन यांना शैलेंद्र यांच्याकडे पाठवलं आणि एका दिवसात गाणं घेऊन येण्यास सांगितलं.

आर. डी. बर्मन यांना समोर पाहून शैलेंद्र यांना समजलं होतं की, सचिनदा रागात आहेत. त्यांनी आर. डी. बर्मन यांना सांगितलं की, ते आज गाणं लिहिणार आहेत. शैलेंद्र यांनी आर. डी. बर्मन यांना सोबत राहण्यास सांगितलं. बर्मन दिवसभर शैलेंद्रसोबत राहिले पण गाणं काही पूर्ण झालं नाही. रात्र झाल्यानंतर शैलेंद्र बर्मनला घेऊन समुद्राच्या किनाऱ्यावर गेले. तिथे शैलेंद्र यांनी सिगारेट ओढत अनवाणी चालायला सुरुवात केली.