सिनेप्रेमींनो, सुट्ट्यांचे बेत आखून ठेवा! 'मयसभा' ते 'गोंधळ'... मुंबईत रंगणार आशियाई चित्रपटांचा महामोळावा; कुठे पाहाल?

महोत्सवाचं उद्घाटन अत्यंत दिमाखदार असणार आहे. 'सान चित्रपट महोत्सवात' समीक्षकांची वाहवा मिळवलेला इंडोनेशियन चित्रपट ‘ऑन यूअर लॅप’ याने या सोहळ्याची पडदा उघडणी होणार आहे. जागतिक सिनेसृष्टीतील बदलत्या प्रवाहांची झलक या महोत्सवात पाहायला मिळेल, हे तर नक्कीच!

यंदाच्या महोत्सवाचं सर्वात मोठं आकर्षण म्हणजे राही अनिल बर्वे. 'तुंबाड' फेम राही यांचा बहुप्रतीक्षित हिंदी सिनेमा ‘मयसभा’ पाहण्यासाठी सिनेरसिक आधीच उत्सुक आहेत. त्यासोबतच, दिग्दर्शक क्षितीज पटवर्धन यांचा अलीकडेच गाजलेला ‘उत्तर’, दिग्दर्शक संतोष डावखर यांचा आशयघन ‘गोंधळ’ हे सिनेमे या महोत्सवाची रंगत वाढवणार आहेत. मराठी प्रतिभेला आंतरराष्ट्रीय मंचावर मिळणारे हे स्थान कौतुकास्पद आहे.

महोत्सवात केवळ सिनेमेच नसून, ज्यांनी भारतीय सिनेसृष्टीला समृद्ध केलं अशा व्यक्तींचा गौरवही होणार आहे. पद्मभूषण सई परांजपे यांना यंदाचा 'आशियाई चित्रपट संस्कृती पुरस्कार' प्रदान केला जाईल. उमा दा कुन्हा यांना 'सत्यजित रे स्मृती पुरस्काराने' सन्मानित करण्यात येईल. मिनाक्षी शेड्डे चित्रपट लेखनातील योगदानासाठी त्यांना दिवंगत सुधीर नांदगावकर स्मृती पुरस्कार दिला जाणार आहे.

हा ९ दिवसांचा महोत्सव ९ जानेवारीपासून सुरू होईल. चित्रपटांचे खेळ मुंबईतील पु. ल. देशपांडे महाराष्ट्र कला अकादमी (मिनी थिएटर) आणि ठाण्यातील लेक शोर मॉलमधील सिनेपोलीस येथे पार पडणार आहेत.