2023 मध्ये ते 3 महिने मराठी इंडस्ट्रीसाठी ठरले वाईट; 90च्या दशकातील दिग्गजांनी घेतला जगाचा निरोप

मुंबई, 13 डिसेंबर :  चंगू मंगू, धमाल बाबल्या गणप्याची, एक गाडी बाकी अनाडी, खतरनाक, होऊन जाऊदे, हमाल दे धमा, थरथराट, धडाकेबाज, गंमत जंमत, झपाटलेला सारख्या एकाहून एक जबरदस्त सिनेमांनी प्रेक्षकांच्या मनावर राज्य करणारे अभिनेते रविंद्र बेर्डे यांचं निधन झालं. दिवंगत अभिनेते लक्ष्मीकांत बेर्डे यांचे ते सख्खे मोठे भाऊ होते. रविंद्र बेर्डे यांनी वयाच्या 76व्या वर्षी अखेरचा श्वास घेतला. मागील अनेक वर्ष ते घशाच्या कॅन्सरशी सामना करत होते. त्यांच्यावर मुंबईतील टाटा रूग्णालयात उपचार सुरू होते.कॅन्सरवरील उपचार सुरू असताना त्यांना हृदयविकाराचा झटका आल्यानं त्यांची प्राणज्योत मालवली. रविंद्र बेर्डे यांच्या निधनानं मराठी इंडस्ट्रीवर शोककळा पसरली आहे. मागील वर्षभरात रविंद्र यांच्याप्रमाणे अनेक मराठी कलाकारांचं निधन झालं.