मुंबईतील मार्गाला ज्येष्ठ अभिनेते रमेश देव यांचं नाव, मुलगा म्हणाला, 'हा स्वप्नपूर्तीचा क्षण'

रमेश देव यांनी मराठीसह अनेक हिंदी सिनेमांमधून त्यांचं अभिनय कौशल्य दाखवलं आहे. अशा या महान कलाकाराला आदरांजली देण्यासाठी आमदार अमित साटम यांच्या संकल्पनेतून हे नामकरण करण्यात आले. मराठी चित्रपटसृष्टीतील नामवंतांचा गौरव करण्यासाठी निर्माण करण्यात आलेल्या ‘मराठी चित्रपट कट्टा’ चे लोकार्पण आणि रस्त्याचे नामकरण सांस्कृतिक कार्यमंत्री आशिष शेलार यांच्या हस्ते करण्यात आले.

याप्रसंगी बोलताना रमेश देव यांचे पुत्र अभिनेते अजिंक्य देव म्हणाले, ‘आज संपूर्ण देव कुटुंबियांसाठी हा स्वप्नपूर्तीचा आणि आनंदाचा दिवस आहे. आज बाबांच्या प्रेमापोटी इथे उपस्थित असलेल्या सर्वांचे मी आभार मानतो. बाबांच्या नावाचा मार्ग झाला याचा खूप आनंद झाला आहे. हे बाबांचे आशीर्वाद आहेत. याचा त्यांना ही निश्चितच आनंद झाला असेल.' याप्रसंगी ज्येष्ठ दिग्दर्शक राजदत्त, ज्येष्ठ गायिका वैशाली सामंत, दिव्या खोसला कुमार, कांचन घाणेकर तसेच विविध क्षेत्रातील मान्यवर मंडळी उपस्थित होते.