डोंबिवली-टिटवाळाकरांसाठी खुशखबर! वाहतूक कोंडीचा त्रास कमी होणार, रिंग रोड प्रकल्पाबाबत आली मोठी अपडेट

कल्याण रिंग रोड प्रकल्पाचे सुमारे 95 टक्के काम पूर्ण झाले असून त्यामुळे डोंबिवली ते टिटवाळा हा प्रवास लवकरच अधिक सोपा आणि कमी वेळेत होणार आहे. कल्याण-डोंबिवली महानगरपालिका हद्दीत उभारण्यात येणारा हा रिंग रोड परिसरातील वाहतूक कोंडी कमी करण्यासाठी अत्यंत महत्त्वाचा मानला जात आहे.

हा प्रकल्प एकूण आठ टप्प्यांमध्ये राबवण्यात येत असून त्यापैकी पाच टप्प्यांचे काम पूर्ण झाले आहे. राहिलेल्या तीन टप्प्यांची कामे सध्या सुरू असून ती वेगाने पूर्ण करण्याचे प्रयत्न सुरू आहेत. डोंबिवली आणि टिटवाळा यांच्यातील अंतर कमी करण्याच्या दृष्टीने हा मार्ग नागरिकांसाठी मोठा दिलासा ठरणार आहे.

मोठागाव ते गोविंदवाडी रोड या तिसऱ्या टप्प्याच्या रस्त्याचे काम पूर्ण झाले असून वाहनचालकांसाठी हा मार्ग खुला करण्यात आला आहे. मात्र टप्पा एक अंतर्गत हेदुटणे ते शिळ रोड या मार्गासाठी आवश्यक असलेल्या जागेचे भूसंपादन अद्याप सुरू आहे.

दरम्यान टप्पा दुसरा म्हणजेच शिळ रोड ते मोठागाव ब्रिज या नियोजित मार्गात भूसंपादनास अनेक अडथळे येत आहेत. स्थानिक अडचणी आणि तांत्रिक कारणांमुळे या टप्प्याच्या कामास उशीर होत असून त्यामुळे या मार्गाचे नव्याने आरेखन करण्याचा निर्णय घेण्यात आला आहे.